د افغانستان فوټبال فدراسیون: د عرب زاده مړینه لويه ضايعه بولو
د دې فدراسيون رييس يوسف کارګر نن شنبه (د لېندۍ ۲۷مه) ازادي راډيو ته وويل، ښاغلی عرب زاده د ۲۰۱۹ میلادي کال په اسیایي سیالیو کې د افغان لوبډلې لپاره په بریاوو کې اغیزناک رول درلود چې دویم مقام یې ترلاسه کړی و.
ښاغلي کارګر وویل، تمه وه چې عرب زاده په راتلونکی کې د فوټسال د لویانو په ملي لوبډله کې هم ولوبېږي.
تراوسه دې افغان لوبغاړي د مرګ د لامل په اړه څه نه دي ویل شوي، خو د افغانستان د فوټبال فدراسیون د جمعې په ورځ پر خپله رسمي فیسبوک پاڼه کې ولیکل چې علي عرب زاده مړ شوی دی.
د معلوماتو پر بنسټ، عرب زاده کلونه په ایران کې په کډوالۍ کې ژوند کاوه.