چارواکی: طالبانو د نوي حکومت د اعلان لپاره چمتووالی نیولی
دا خبره رویټرز اژانس د طالبانو د چارواکو په حواله نن پنجشنبه (د وږې په ۱۱مه) راپور ورکړې.
رویټرز د احمدالله متقي په نوم د طالبانو د فرهنګي کمېسیون د غړي په حواله لیکلي چې په ارګ کې په دې تړاو پنجشنبه د یوې غونډې ترتیب نیول شوی دی.
تر دې دوه ورځې مخکې د طالبانو د سیاسي دفتر غړي شېر محمدعباس ستانکزي ویلي و چې دوی به نوی حکومت په دوو ورځو کې اعلان کړي.
نړیوالې ټولنې ویلي چې د طالبانو اعمال څاري او د هغه په مطابق به مخته ځي.
طالبانو کابو دوه اوونۍ وړاندې له پنجشېر پرته ټول افغانستان ونیوه، خو تردې دمه یې حکومت نه دی جوړ کړی چې دې چارې اکثر ټولنیز او اقتصادي فعالیتونه په ټپه درولي دي.