افغانستان په روان مالي کال کې د سویابینو ۴۲۰ ننداریزې کروندې جوړوي
د دغه وزارت ویاند اکبر رستمي نن دوشنبه (د زمري ۱۸مه) ازادي راډیو ته وویل جې دا کروندې د هېواد په ۱۷ ولایتونو کې جوړېږي.
نوموړي وویل چې په ټولیزه توګه د دغو ننداریزو کروندو د جوړولو چارې نږدې په بشپړېدو دي او له دې شمېر د هرات، پکتیا، ننګرهار، کاپیسا، بغلان، بلخ، جوزجان او فاریاب په ولایتونو کې د ۲۱ ننداریزو کروندو چارې بشپړ شوي دي.
یادې کروندې په داسې حال کې جوړېږي چې هغو ولایتونو کې چې د یاد نبات تولید لپاره مناسب اقلیمي شرایط لري د تولید کچه یې کال تر بله زیاتېږي.
د کرنې اوبو لګولو او مالدارۍ وزارت، د معلوماتو او احصایې ریاست د چارواکو په خبره، د سویابینو کښت د هېواد په اکثره ولایتونو کې ښه پایله ورکړې ده.
د دغه ریاست د ۱۳۹۹یم کال د شمېرو له مخې د هېواد په کچه په یو زر او ۶۲۴ هکټاره ځمکه سویابین کرل شوي وو او ټولټال دوه زره ټنه سویا ترې لاسته راغلې ده چې په اوسط ډول له یوه هکټاره ځمکې څخه ۱.۲۳ ټنه سویابین ترلاسه شوي دي.
د معلوماتو او احصایې ریاست د چارواکو په خبره، کاپیسا د ۹۳۰ ټنه په تولید سره د هېواد په کچه د سویابینو په تولید کې لومړی مقام لري.
سویابین بشپړه پروتیني او مغذي مواد لري او د کورنیو په روغتیا په ځانګړي ډول د ماشومانو د خوارځواکۍ په مخنیوي کې رغنده رول لري.
افغانستان کې د سویابینو کرکېله په ۲۰۰۳ میلادي کال کې دود شوې ده چې اوس په یو مهم کرنیز توکي بدل شوی او د هېواد په ډېرو ولایتونو کې کرل کېږي.