سوله؛ افغان دولتي پلاوی د مسکو له غونډې بېرته راستون شو
د افغانستان د دولت پلاوی تېره شپه د مسکو له غونډې بېرته راستون شو.
د پلاوي مشر او د ملي مصالحې عالي شورا رئیس عبدالله عبدالله ویلي، د روسیې، امریکا، چین او پاکستان ابتکار به د جګړې د پای ته رسولو لپاره مهم ګام وي.
ده پر خپله ټویټرپاڼه لیکلي، دې غونډه کې د سولې بهیر پر چټکتیا او له رامنځته شوي فرصته په استفادې او ورته نورو مسایلو خبرې شوي دي.
بل لور ته د پاکستان د بهرنیو چارو وزارت د افغانستان د سولې په اړه په مسکو کې وروستۍ غونډه مهمه وبلله.
د دغه وزارت ویاند زاهد حفیظ چوهدري، پرون په اسلام اباد کې یوه کنفرانس ته وویل، افغانستان کې سوله د خلکو او د سیمې د پرمختګ خوب په واقعیت بدلوي.
د دغې غونډې په یوه اعلامیه کې کوربه هېواد روسیې او دغه راز د امریکا، چین او پاکستان استازیو افغانستان کې د سولې او سملاسي اوربند غوښتنه وکړه.