ایرانيالاصله بریتانوۍ نازنین زاغري راتکلیف له ۵ کلن بند وروسته خوشې شوه
د تهران له ایوین زندانه د یوه خیریه بنسټ د کارکوونکې د خوشې کېدلو موضوع پرون یکشنبه خبر جوړوونکې شوه.
هغې د ټامسن روېټرز خیریه بنسټ ته کار کاوه چې په ۲۰۱۶م کال کې له بریتانیا ایران ته د تګ پر مهال د تهران په هوايي ډګر کې ونیول شوه.
نازنین زاغري راتکلیف پنځه کاله په زندان کې تېر کړل، خو تر اوسه معلومه نهده چې تر خوشې کېدو وروسته له ایرانه د وتلو اجازه لري که نه.
د ټامسن روېټرز خیریه بنسټ اجرائیه مشر انتونیو زاپولا پرون یکشنبه د فرانسې خبري اژانس ته وویل، له نازنین زاغري راتکلیف سرهیې د ټیلیفون له لارې خبرې کړي چې روحیهیې ښه وه.
هغه وايي: "هغه ډېره خوشحاله وه. له هغه وخته چې زنداني شوې د هغې غږ مې داسې نهو اورېدلی. هغې راته وویل چې احساسیې غیر معمولي دی. د واټساپ په پیغام کې یې د زړه نښه راولېږله او له شک پرته چې ښه روحیهیې وه."
مېرمن نازنین زاغري راتکلیف چې اوس د ۴۲ کلونو ده، د بریتانیا تابعیت هم لري.
هغې چې کلونه کلونهیې د ټامسن روېټرز خیریه بنسټ د پروژو د مدیرې په توګه کار کړی، په ۲۰۱۶م کال کې د خپلو خپلوانو د لیدلو لپاره ایران ته لاړه چې د تهران په هوايي ډګر کې ونیول شوه.
نیمه رسمي خبري اژانس ایسنا راپور ورکړی، ایرانيالاصله نازنین زاغري راتکلیف چې د بریتانیا تابعیت هم لري، باید راروانه شنبه یو وار بیا محکمې ته حاضره شي.
د بریتانیا د بهرنیو چارو وزیر ډامنیک راب پرون په یوه اعلامیه کې وویل چې مېرمن نازنین باید سم د لاسه خوشې او په بریتانیا کې خپلې کورنۍ ته ستنه شي.
ایراني چارواکو تور لګولی چې مېرمن نازنین د ایران د رژیم د نسکورولو هڅه کوله، خو مېرمن نازنین دا ادعا رد کړې ده.
د نازنین زاغري راتکلیف مېړه ریچارد راتکلیف په خپلو تازه څرګندونو کې ویلي که د ایران حکومت نورې پلمې ونهکړي مېرمنیې باید د مارچ پر اوومه د پنځو کلونو بند له تېرولو وروسته خوشې کېدلای.
تر دې مخکې د بریتانیا دولت خبرداری ورکړی و، که نازنین زاغري راتکلیف بیا محکومه یا زندان ته واچول شي، له ایران سره به پر خپلو اړیکو بیاکتنه وکړي.