Миңнеханов Осиновода завод төзү карарын халыкара экспертизадан соң гына кабул итәчәк

(Казан, 19 декабрь, «Татар-информ»). Осиново бистәсендә калдыкларны термик зарарсызландыру заводын төзү проекты хакында Татарстан Президенты Рөстәм Миңнеханов дәрәҗәсендә халыкара экспертиза нәтиҗәләре алынганнан соң гына фикер алышып булачак. Казан Кремленең рәсми вәкиле Лилия Галимова «Татар-информ» агентлыгы хәбәрчесенә шулай дип белдерде.

«Республика Президентына беренче вице-премьерның калдыкларны термик зарарсызландыру заводын төзү мәсьәләсе буенча инициатив төркем белән очрашуы хакында хәбәр иттеләр. Рөстәм Миңнеханов аңлату эшләрен дәвам итәргә һәм әлеге проектка каршы чыккан гражданнар белән диалог үткәрергә йөкләмә бирде», - дип ачыклык кертте Галимова.

Аның сүзләренчә, Рөстәм Миңнеханов халыкара экологик экспертиза үткәрүнең әһәмиятен һәм Осиново бистәсендә аннан башка завод төзелә башламаячагын искәрткән.

«Бу этапта проектка тулы анализ ясалуы хакында сөйләргә иртәрәк әле. Чит ил экспертларыннан нәтиҗәләр килгәч, бу хакта Президент дәрәҗәсендә аерым фикер алышулар үткәреләчәк», - дип билгеләп үтте Казан Кремленең рәсми вәкиле.

Бүген ТР Хөкүмәте йортында термик зарарсызландыру заводын төзүгә каршы чыккан экоактивистлар белән очрашу узды. Очрашуда Татарстанның беренче вице-премьеры Рөстәм Нигъмәтуллин, ТР экология һәм табигый ресурслар министры Александр Шадриков, Казан мэры Илсур Метшин катнашты.