ტომას ჰენდრიკ ილვესი: დაუყოვნებლივ გაათავისუფლეთ ვაჟა გაფრინდაშვილი
„გამარჯობა. მე ვარ ტომას ჰენდრიკ ილვესი. მოვუწოდებ სამხრეთ ოსეთის დე ფაქტო ხელისუფლებას, დაუყოვნებლივ გაათავისუფლოს ექიმი გაფრინდაშვილი. ექიმი, რომელიც ასრულებდა თავის პროფესიულ მოვალეობას, რომ მომსახურებოდა ადამიანებს ტერიტორიაზე, სადაც არ არსებობს ადეკვატური სამედიცინო მომსახურება. გაათავისუფლეთ გაფრინდაშვილი!“ - ამბობს ტომას ჰენდრიკ ილვესი. მისი და მისი მეუღლის ერთობლივ მიმართვას საქართველოში ესტონეთის საელჩო ავრცელებს.
საოკუპაციო ძალების წარმომადგენლებმა თბილისელი ექიმი-ტრავმატოლოგი ვაჟა გაფრინდაშვილი 9 ნოემბერს, ახალგორის რაიონთან დააკავეს და ბრალი წაუყენეს ე.წ. საზღვრის განზრახ დარღვევაში, რაც დე ფაქტო კანონმდებლობით სისხლის სამართლის დანაშაულად ითვლება. დე ფაქტო სასამართლომ ვაჟა გაფრინდაშვილს ორთვიანი პატიმრობა მიუსაჯა.