სონდლენდის თქმით, თეთრი სახლი უკრაინაზე ზეწოლას ახორციელებდა ბაიდენზე გამოძიების მოთხოვნით

აშშ-ის კონგრესის წარმომადგენელთა პალატაში პრეზიდენტ დონალდ ტრამპის იმპიჩმენტთან დაკავშირებული გამოძიების ფარგლებში, ევროკავშირში აშშ-ის ელჩმა, გორდონ სონდლენდმა თქვა, რომ სახელმწიფო დეპარტამენტსა და სახელმწიფო მდივან მაიკ პომპეოს ატყობინებდა უკრაინაზე ზეწოლის შესახებ, რომ სამხედრო დახმარების სანაცვლოდ გამოძიება ეწარმოებინა ტრამპის პოლიტიკური მეტოქის, ჯო ბაიდენის საქმეზე. მან მკაფიოდ აღნიშნა, რომ ეს იყო „quid-pro-quo“, ანუ სამსახური სამსახურის სანაცვლოდ.

სონდლენდმა ასევე თქვა, რომ „პრეზიდენტის მითითებებს“ ასრულებდა უკრაინასთან ურთიერთობებში და რომ ტრამპის პირად ადვოკატთან, რუდი ჯულიანისთან თანამშრომლობდა.

სონდლენდის განცხადება შესაძლოა კრიტიკული დარტყმა იყოს თეთრი სახლის მტკიცებულებისთვის, რომ არ ყოფილა კავშირი უკრაინისთვის სამხედრო დახმარებასა და ბაიდენთან დაკავშირებულ გამოძიებას შორის. პრეზიდენტის დამცველები აცხადებენ, რომ არ ყოფილა „quid-pro-quo“.

როგორც თავის გამხსნელ განცხადებაში თქვა სონდლენდმა, ის ვიცე-პრეზიდენტ მაიკ პენსს ელაპარაკა თავის „შეშფოთებაზე“ იმის გამო, რომ უკრაინისთვის სამხედრო დახმარების საკითხი გამოძიებას „დაუკავშირდა“.

სონდლენდის თქმით "ყველა განდობილი იყო", ეს "არ ყოფილა საიდუმლო".

კანონმდებლები იძიებენ, ბოროტად გამოიყენა თუ არა ტრამპმა უფლებამოსილებები და ეცადა თუ არა ბაიდენის წინააღმდეგ გამოძიებისთვის უცხო ქვეყნის მხრიდან დახმარების მიღებას. ბაიდენი ტრამპის პოტენციური ოპონენტია 2020 წლის საპრეზიდენტო არჩევნებში.

ტრამპი უარყოფს ბრალდებებს და გამოძიებას „კუდიანებზე ნადირობას“ უწოდებს.