ვაჟა სირაძე: არანაირი ცეცხლსასროლი იარაღი პარლამენტის ტერიტორიაზე არ არის
საპატრულო პოლიციის დეპარტამენტის დირექტორის, ვაჟა სირაძის განცხადებით, პარლამენტთან პოლიციის საგანგებო მობილიზაციის მიზანი უსაფრთხოების ნორმების დაცვაა და საპოლიციო ძალების მობილიზებაც ამით აიხსნება.
მისი თქმით, პარლამენტის შენობაში არიან შსს-ს განსაკუთრებულ დავალებათა დეპარტამენტის წარმომადგენლები, რომელთაც აქვთ მხოლოდ საკუთარი აღჭურვილობა, თუმცა არ აქვთ ცეცხლსასროლი იარაღი.
„არანაირი ცეცხლსასროლი იარაღი პარლამენტის ტერიტორიაზე არ არის, ამის გარანტიას მე გაძლევთ და ამაზე მე ვარ პასუხისმგებელი“, - უთხრა ვაჟა სირაძემ ჟურნალისტებს.
ვაჟა სირაძის განცხადებით, სიტუაციის გამწვავების შემთხვევაში სამართალდამცავები დაიცავენ საზოგადოების უსაფრთხოებას.
საპროტესტო აქცია პარლამენტთან რამდენიმე წუთში დაიწყება. ოპოზიციური პოლიტიკური პარტიების ლიდერები აქციას პუშკინის სკვერიდან და ოპერის შენობიდან მსვლელობით შეუერთდებიან. მათი მოთხოვნა ვადამდელი საპარლამენტო არჩევნების პროპორციული წესით ჩატარებაა.
დღესვე, 17.00 საათზე, თბილისში აქციას „პატრიოტთა ალიანსიც“ გამართავს - მათი მოთხოვნა „ქართული ოცნების“ ხელისუფლებიდან წასვლაა.