ირანში მიმდინარე საპროტესტო გამოსვლების ფონზე გათიშეს ინტერნეტი და მობილური კავშირი
ირანში მიმდინარე საპროტესტო გამოსვლების ფონზე გათიშეს ინტერნეტი და მობილური კავშირი. ქვეყნის უდიდეს ნაწილში შეწყდა საკომუნიკაციო საშუალებებზე წვდომა.
მიტინგები 15 ნოემბერს დაიწყო ერთდროულად რამდენიმე ქალაქში. მიზეზია ბენზინის ფასების ზრდა და საწვავის გაყიდვაზე დაწესებული ლიმიტი. ხელისუფლება აცხადებს, რომ მხოლოდ ასე შეიძლება ეკონომიკური პრობლემების მოგვარება, რომლებიც, სხვათა შორის, დაკავშირებულია აშშ-ის მიერ დაწესებულ სანქციებთან. ირანის მედიის ცნობით, შაბათს აქციებმა, სულ მცირე, ორმოცამდე ქალაქი მოიცვა.
ირანის მედია და სოცქსელების მომხმარებლები ასევე აღნიშნავდნენ, რომ დემონსტრანტები მთელი ქვეყნის მასშტაბით სკანდირებდნენ ანტისამთავრობო ლოზუნგებს. გამოქვეყნდა ვიდეოები, რომლებზეც ჩანს, როგორ უკიდებდნენ რადიკალი აქტივისტები ცეცხლს ბენზინგასამართ სადგურებს, საფინანსო დაწესებულებებს, ასევე შეტაკებებს აწყობდნენ პოლიციასთან.
როგორც იტყობინებიან, პოლიციასთან შეტაკებებში ერთი ადამიანი დაიღუპა.
ირანის უზენაესმა სულიერმა ლიდერმა აიათოლა ალი ხამენეიმ მხარი დაუჭირა საწვავზე ფასების გაზრდას და „რესპუბლიკის მტრებს“ „საბოტაჟში“ დასდო ბრალი.