გია ვოლსკი: პიკეტირება უპირისპირდება სახელმწიფო ინტერესებს
საპარლამენტო უმრავლესობის ლიდერი გია ვოლსკი ამბობს, რომ პარლამენტის პიკეტირება სახელმწიფოს ინტერესებს უპირისპირდება. პარლამენტთან მიმდინარე აქციაზე ოპოზიციის ლიდერების მიერ საკანონმდებლო ორგანოს შენობის პიკეტირების საკითხზე გაკეთებული განცხადებების საპასუხოდ, გია ვოლსკიმ აღნიშნა, რომ სახელმწიფომ არ უნდა დაუშვას ქვეყნის გაჩერება:
„უნდა ვიაროთ სამსახურში. უამრავი თემაა... საფრთხე იმისა, რომ სახელმწიფო გააჩერონ, ლარის კურსი დაეცეს და მოხდეს ეკონომიკური კოლაფსი, არ უნდა დაუშვას სახელმწიფომ და ესაა საზოგადოების მოთხოვნაც...
პიკეტირება ესაა ამ ადამიანების პოლიტიკის გამოხატულება, მონაწილეობა მიაღებინონ ხალხს ისეთ ქმედებებში, რომელიც კანონსაც უპირისპირდება და, რაც მთავარია, უპირისპირდება სახელმწიფო ინტერესებს“, - განაცხადა გია ვოლსკიმ.
საქართველოს პარლამენტის წინ ოპოზიციური სპექტრის პოლიტიკური პარტიებისა და სამოქალაქო აქტივევის ფართომასშტაბიანი საპროტესტო აქცია მიმდინარეობს.
ოპოზიციური პარტიები ითხოვენ პროპორციული წესით ვადამდელი საპარლამენტო არჩევნების გამართვას, მთავრობის გადადგომას და, შესაბამისად, ცვლილებებს საარჩევნო კომისიებში.