აშშ-ის კონგრესში იმართება პირველი საჯარო მოსმენა ტრამპის შესაძლო იმპიჩმენტის თაობაზე
გამოძიებამ პასუხი უნდა გასცეს შეკითხვას, ახდენდა თუ არა ტრამპი უკრაინის ხელისუფლებაზე ზეწოლას იმ მიზნით, რომ ზიანი მიეყენებინა თავისი პოლიტიკური ოპონენტის, დემოკრატ ჯო ბაიდენისთვის, და თუკი ეს ასე იყო, ექვემდებარება თუ არა ასეთი მოქმედებები იმპიჩმენტს. შესაძლოა ტრამპისთვის სხვა ბრალდებების წაყენებაც, მაგალითად, მართლმსაჯულებისთვის ხელის შეშლის თაობაზე.
საჯარო მოსმენა გამოძიების ახალი ეტაპია. ერთ თვეზე მეტია, კომიტეტში მოწმეებთან საუბარი მხოლოდ დახურულ კარს მიღმა მიმდინარეობდა. ტრამპი და მისი მომხრე რესპუბლიკელები დემოკრატებს მიკერძოებულობასა და პროცედურების დარღვევაში ადანაშაულებენ. ოქტომბრის ბოლოს წარმომადგენელთა პალატამ, სადაც უმრავლესობა დემოკრატების ხელშია, მიიღო რეზოლუცია, რომელიც იწონებს გამოძიების ფარგლებში შემდგომ ნაბიჯებს, მათ შორის - საჯარო მოსმენების გამართვას.
ოთხშაბათს საჯარო ჩვენებებს იძლევიან უილიამ ტეილორი, რომელიც ამჟამად უკრაინაში აშშ-ის საელჩოს ხელმძღვანელის მოვალეობას ასრულებს, და ჯორჯ კენტი - ევროპისა და ევრაზიის საკითხებში აშშ-ის სახელმწიფო მდივნის თანაშემწის მოადგილე. ორივემ უკვე მისცა დაზვერვის კომიტეტში ჩვენებები დახურულ კარს მიღმა.
დემოკრატები განსაკუთრებულ ყურადღებას აქცევენ ტეილორის ჩვენებებს, რომელიც კერძოდ აცხადებდა, რომ ტრამპის ადმინისტრაციის ჩინოვნიკები მის პირად იურისტ რუდი ჯულიანისთან ერთად მოითხოვდნენ, რომ უკრაინის ხელისუფლებას განეახლებინა გამოძიება უკრაინაში ჯო ბაიდენის ვაჟის, ჰანტერის საქმიანობის შესახებ. დემოკრატების თანახმად, ტრამპის გარემოცვა კიევზე ზეწოლისთვის უკრაინისთვის სამხედრო დახმარების შეჩერებას იყენებდა.
პრეზიდენტი ტრამპი გამოძიებას „კუდიანებზე ნადირობას“ უწოდებს და მიიჩნევს, რომ დემოკრატები მასთან პოლიტიკურ ანგარიშსწორებას ეწევიან.