ირანის უზენაესი ლიდერი შეუძლებლად მიიჩნევს ვაშინგტონთან ნებისმიერ მოლაპარაკებას
ირანის უზენაესი სასულიერო ლიდერი აიათოლა ალი ხამენეი აცხადებს, რომ თეირანი ინარჩუნებს აკრძალვას აშშ-სთან ნებისმიერი სახის მოლაპარაკების გამართვის თაობაზე.
„ამერიკის პოლიტიკური ინფილტრაციის თავიდან აცილების ერთადერთი გზა, მასთან ნებისმიერი სახის მოლაპარაკების აკრძალვაა. ეს ნიშნავს, რომ ირანი არ დაჰყვება აშშ-ის ზეწოლას“, - განაცხადა აიათოლა ალი ხამენეიმ 3 ნოემბერს, თეირანში აშშ-ის საელჩოს ხელში ჩაგდების 40-ე წლისთავთან დაკავშირებული მიმართვის დროს.
აიათოლა ალი ხამენეი შეცდომად მიიჩნევს მოსაზრებას, თითქოს, ვაშინგტონთან მოლაპარაკებით შესაძლებელი იყოს პრობლემების მოგვარება.
„აშშ-სთან მოლაპარაკება აშკარად არაფერს მოიტანს, რადგან ისინი ნამდვილად არ წავლენ არავითარ დათმობაზე“, - განაცხადა ირანის უზენაესმა სასულიერო ლიდერმა.
ორ ქვეყანას შორის არსებული დაძაბული ურთიერთობები კიდევ უფრო მკვეთრად გაუარესდა მას შემდეგ, რაც აშშ-ის პრეზიდენტის დონალდ ტრამპის გადაწყვეტილებით, აშშ-მა დატოვა 2015 წლის საერთაშორისო შეთანხმება, რომელიც ითვალისწინებდა თეირანისათვის დაწესებული დამანგრეველი ეკონომიკური სანქციების შერბილებას ირანის ბირთვული პროგრამის შემცირების სანაცვლოდ.