Новости за 12.08.2019

Навальный Алексейн Коррупцица къуьйсучу фондо чIагIдарехь, Оьрсийчоьнан Харжамийн Коьрта комиссин декъашхочун Эбзеев Борисан кIентан кIанта Эбзеев Артура Москох юккъехь эцначу петаран мах бу 500 миллион сом. Петар цо эцна шен 4 шо долуш. «Дашо чаккхарма» («Золотая миля») олучу куьпахь, Зачатьевскан урамехь ю юьйцу 274 квадрат-метр йолу петар. Эцна иза Эбзеев-жимахчо, документаша бахарехь, 2009-чу шарахь. Навальныйс билгалдоккху, петар кIантанна совгIат йина а йоцуш, цо ша эцна хилар. Петар эцначу беран денден а... Читать дальше...

Чемпион Тасуханов Сайд-Мохьмад кхелхина, "юккъера класс" кIезиг ю кавказхошлахь, юха а аьлла арбитрах "газа"

Адыгейхь, ГIирмехь, Краснодар, Волгоград, Ростов мехкашкахь Шемахь тIом беш лелийна тактика шаръеш ду Оьрсийчоьнан эскарш. Хьолан кхачояран, гIагIадиллинчу техникан говзанчаш, хIордан салтий – верриг а 6500 эскархо ву Iаморашка араваьккхина. Барамашкахь дакъалоцу 2500 тIеман герзаш кхуьйчучу машенаша. Оцу хьокъехь хаамбина Къилба федералан гонерчу пресс-гIоьнчалло. БIеннаш тIеман хаарш довзуьйту салташна, боху хьукмато.

Уггаре кIезиг ду сов дерстина бераш Нохчийчохь. Украинера схьяьккхинчу Севастополехь а, Приморскан махкахь а ду бераш дилхаца гIехьа. Иштта довзийтина Оьрсийчоьнан могашаллин министралло ша стохка бинчу тидамийн жамI. Сов дерстина бераш массанхьачул а дукха ду Ульяновск, Орел, Рязан мехкашкахь, хаамбо  РИА "Новости" агенталло. Оьрсийчохь дерриг а сов дерстина бер ду 338 500. Царех 97 эзар бер тIех дерстинчу берийн тептара даьхна могашаллин министралло дукха хан йоццуш.

Махкарчу кхачан башхаллаш зуьйчу Россельхознадзор урхаллин декъо 650 кийла Польшера деана Iежаш хIаллакдина.   Стоьмаш карийна дозанхошна ХIинжа-ГIалин йистерчу цхьана блок-постехула чекхйолу машен толлуш, боху хьукматан пресс-гIоьнчаша. Дийцарехь, документаш а доцуш дохьуш хилла Дагестане Iежаш. Машенлелорхо жоьпалле озийна Iедало.

Оьрсийчоьнан регионашка бураман некъаш дахка Iалашо ю Туркменистанан, дIахьедина оцу пачхьалкхан арахьарчу гIуллакхийн министран хьехамчас Дурдыев Сердара Таркхойн хIорда гонахарчу мехкийн экономикан форумехь. Туркменистанера бурамаш лелар ду Астраханан махка а, Дагестане а, хаамбо ТАСС агенталло. Агенталло дагадоуьйту "ХIинжа-ГIала – Туркменбаши" бурам юкъадаьккхина хилар 2002-чу шарахь. Амма иза сецира шо а далале.

"Путина, шега хаам кхаьчча, элира: "Ас террорхошца барт ца бо". "1500 бер цу чохь хилча, муха ца бо барт? Муха?"

Оьрсийчуьрчу нахалахь гIеххьа, я "юккъера" таро йолу нах багарбина РИА "Новости" агенталло. Уггаре кIезиг бу и тайпа бахархой ("юккъера класс") Къилбаседа Кавказехь. Талламо бахарехь, массарел кIезиг бу "юккъера таро" йолу нах ГIалгIайчохь, Дагестанехь, Нохчийчохь, ГIебарта-Балкхаройчохь, Кхарачой-Чергазийчохь – 1,9 - 4,4 процент.   Уггаре дукха ю бахархошлахь "юккъера класс" Ямал-Ненцойн, Магаданан, Чукотка мехкашкахь – 34-45%. Лакхарчу итт меттигашна юкъайогIу Москох (26,8%), Петарбух (25,7%). Читать дальше...

ГIиргIазойчуьрчу нохчийн хIора доьзало даздо ГIурба, сагIа доккху шайна тIера, тароне хьаьжина. Лебединовка эвларчу АдаевгIеран доьзало уьстагIий дайира. Церан къаношна дагадогIу нохчийн оцу махка кхаьчна хьалхара шераш – къоьлла, мацалла, баларш. Цундела, белларш дага а лоцуш, Деле Нохчийчоьнна а, шайна а къинхетам а боьхуш, Iамалшкахь даккхира цара дезаде.

"Ахмат" –"Спартак" ловзуш, 82-чу минотехь, кхелахочух Сухин Алексейх "газа" аьлла. "Ахматан" коьрта тIелатархо Мбенга Аблай кхелахочо ловзарна юкъараваккхар ца тайра хьовсархошна. Мила ву хууш воцчу цхьамма, ерриг а стадионна а хезаш, микрофонехула мохь хьаькхира: "Газа ю кхелахо", хаамбо "Спорт Экспрессо". Цул тIаьхьа ах сахьт даьлча, 3:1 жамI а долуш, тоьлла "Спартак". ТIаьхьакхиина таллам бинарш мила хилла  кхелахочух "газа" аьлларг. "Ахмат Аренин" пресс-гIоьнчаллин белхахо – ткъа хIинца "хилла белхахо" - Эдильсултанов Ризван ву иза. Читать дальше...

Финляндино дозалла деш хилла 18 шо долу нохчо, охьатохархлатархо Тасуханов Сайд-Мохьмад дайначу кIиран шинарийдийнахь лазийра Тарту (Эстони) гIалина гергахь, пассажирийн автобуссий, шен машенний тIеттIакхетарца. Даймахка вахана, цигахь денош а даьхна, Финлянде юхавогIуш хилла Тасуханов некъахьовзам хуьлуш. Финнийн латархойн Helsingin Paini Miehet клубо халахетарца хаийтина иза некъахьовзамехь хиллачу чевнех Тартурчу дарбанцIийнехь кIирандийнахь дIаваьлла хиларх лаьцна. "Дагахьбаллам бийца ца тоьу дешнаш. Читать дальше...

Норвегин полицин векало терроран тохар хила тарло боху Осло шахьарна уллерчу Сандвикехь маьждига чуиккхинчу меттигерчу вахархочо, цхьа стаг а лазош, герз деттар. Лаьцначун цIе ца яьккхина хIинца а, иза пачхьалкхо мигранташ тIеэцарна резабоцучех ву, билгалдоккху низаманхоша. 20 шо долу иза, маьждига чу а веана, герз детта хIуттуш чохь кхо стаг бен ца хилла. Амма чуьрачара лаьцна, полици схьакхаччалц шайгахь латтийна иза. ГIурбан Дийнахь дина зулам. 2011-чу шарахь террорхочо Брейвик Андерса Норвегехь бехачу мигранташка а... Читать дальше...