Новости за 23.08.2023

Бүгенге көндә Зәйдә Курск дугасында бәрелешләрендә катнашкан өч сугыш ветераны яши. Алар – Валентина Лыкова, Анна Моисеева, Леонид Мачтаков. Бу хакта «Зәй хәбәрләре» сайтында язалар.

Татарстан Милли музее филиалы Салих Сәйдәшев музеенда уйлану кичәсе булды. Кичәдә мультиинструменталист Айдар Абдрахимов кунаклар өчен төрле музыка уен коралларында этник музыка яңгыратты, шулай ук, кунакларга чәй тәкъдим ителде.

Бүген Мәскәүдә Татарстан мәдәнияте көннәре башланды, ул 25 августка кадәр дәвам итәчәк. Бу хакта Татарстан Республикасы Мәдәният министрлыгы матбугат хезмәте хәбәр итә.

Алдагы эш атнасы Татарстан халкы өчен кыска булачак, чөнки 30 августта Республика көне билгеләп үтелә. Бу хакта Татарстан Хезмәт министрлыгы хәбәр итә.

Бүген Тверь өлкәсендә булган Embraer самолеты һәлакәте факты буенча Россия Тикшерү комитетының Баш Тикшерү идарәсе РФ Җинаять Кодексының «һава транспорты хәрәкәте һәм эксплуатациясе куркынычсызлыгы кагыйдәләрен бозу» маддәсе буенча җинаять эше кузгаткан. Бу хакта ведомствоның матбугат хезмәте хәбәр итә.

Татарстан башкаласы 2023 елның җәендә сәяхәтчеләр арасында иң популяр Россия шәһәрләре арасында дүртенче урында тора. Бу хакта OneTwoTrip хезмәте мәгълүматларына сылтама белән Казан мэриясенең матбугат хезмәте хәбәр итә.

Татарстаннан 12 мәктәп RAEX агентлыгы төзегән Россиянең иң яхшы мәктәпләре еллык рейтингына кергән.

Тверь өлкәсендә Мәскәү-Петербург рейсы белән очкан Embraer Legacy шәхси самолеты һәлакәткә юлыккан. Борттагы ун кешенең барысы да һәлак булган. Бу хакта Россия Гадәттән тыш хәлләр министрлыгына сылтама белән РИА Новости яза.

Бөтен Россия буенча мәктәп, колледж һәм техникумнарда 29 һәм 30 августта уку йортлары һәм сак хезмәткәрләре өчен укулар оештырыла. Ул террорчылык куркынычы янаганда эш итү сценариен өйрәнүгә багышлана һәм беренче тапкыр уза. Бу хакта Россия Федерациясе Мәгариф министрлыгының матбугат хезмәте хәбәр итә.

Бүген Татарстанның Яңа Чишмә районында «Бердәм Россия» көне узды. Чарада Татарстан Республикасы Дәүләт Советы Рәисе, партиянең төбәк бүлекчәсе секретаре Фәрит Мөхәммәтшин катнашты.

Татарстан Рәисе Рөстәм Миңнеханов Менделеевскига эш сәфәре кысаларында «Аммоний» заводында булды, анда дизель двигательләреннән чыккан газны чистарту өчен реагентлар җитештерүне башлап җибәрү эшләрен бәяләде. Бу хакта Татарстан лидерының матбугат хезмәте хәбәр итә.

Татарстан икътисадына Россиянең башка төбәкләреннән кергән инвестицияләр өч тапкырга арткан. Бу хакта Татарстан Республикасының Инвестиция үсеше агентлыгы җитәкчесе Талия Миңнуллина сәнәгать предприятиеләре җитәкчеләренең министрлык һәм ведомство вәкилләре белән очрашуында хәбәр итте.

Мордовия Республикасы Азюрка авылының матур почмагында татарларның дини традицияләрен, милли мәдәниятен белү һәм спорт традицияләрен үстерү буенча традицион республика ярышлары узды. Бу хакта Бөтендөнья татар конгрессы матбугат хезмәте хәбәр итә.

Татарстан суды мошенникларда курьер булып эшләгән Оренбург өлкәсеннән 16 яшьлек кызга хөкем карары чыгарган. Бу хакта Татарстан Республикасы прокурорының өлкән ярдәмчесе Руслан Галиев хәбәр итә.

Татарстан Рәисе Рөстәм Миңнеханов Менделеевск районына сәфәре барышында «Менделеев токымнары» 3нче химия-технология лицеенда булды — анда капиталь ремонт үткәрелгән.

Бөек Ватан сугышында катнашкан хезмәт ветераны Леонид Мачтаков 18 августта үзенең йөз яшьлек юбилеен билгеләп үтте. Бүген Зәй шәһәрендә командировкада булган Татарстан Рәисе Рөстәм Миңнеханов аны бәйрәме белән котлады.

Татарстан Республикасы Дәүләт Советы Рәисе, «Бердәм Россия»нең төбәк бүлеге секретаре Фәрит Мөхәммәтшин «Мәктәпкә җыенырга ярдәм ит» республика хәйрия акциясендә катнашты. Парламент башлыгы Яңа Чишмә районының беренче сыйныфка баручы укучыларына портфельләр тапшырды, алар арасында махсус хәрби операциядә катнашучыларның балалары да бар иде.

ТР мөселманнары Диния нәзарәтенең «Зәкят» хәйрия фонды «Мөхәммәдия» шәкертләренә 200 литр бал тапшырды. Күчтәнәч Татарстан районнарының берсендә гомер итүче битараф булмаган кеше тарафыннан әзерләнде һәм гошер сәдакасы буларак бирелде. Шәкертләр «Зәкят» хәйрия фондына шундый зур бүләк өчен рәхмәт әйтте, дип хәбәр итә ТР Диния нәзарәте матбугат хезмәте.

Татарстан Рәисе Рөстәм Миңнеханов Менделеевскида «Атмосфера» иҗтимагый киңлеген — гөмбәз рәвешендәге корылманы ачуда катнашты. Бу хакта республика җитәкчесе матбугат хезмәте хәбәр итә.

Актаныш районының «Баламишкин» халык ансамбле җитәкчесе Илдус Харунов авыл урамнарында гармунда уйнап йөрү гадәтен кире кайтару тәҗрибәсе турында сөйләде.

2023 елның җиде аенда Казанда 16 яшькә кадәрге балалар катнашында 81 юл-транспорт һәлакәте теркәлгән. Аларда 87 бала төрле җәрәхәт алган. Әти-әниләр үз балалары иминлегенә җитди карарга тиеш, дип искәртә ЮХИДИ.

Россия киләсе елда яңа БРИКС саммитын кабул итәчәк. Әлегә аның төгәл вакыты билгеләнмәгән. Әмма хәзер үк инде берләшмә вәкилләренең төп очрашу урыны итеп Казанны кую тәкъдим ителә, диде Россия Федерациясе Президенты Владимир Путин.

Татарстан Рәисе Рөстәм Миңнеханов Менделеевск районында күптән түгел капиталь ремонт тәмамланган хәрби комиссариатны карады. Ул башкарылган эшләрнең югары сыйфатлы булуын билгеләп үтте. Бу хакта Татарстан Республикасы Рәисе матбугат хезмәте хәбәр итә.

Кичә Казанда Datsun автомобиленең 37 яшьлек йөртүчесе светофорның кызыл уты янган вакытта самокатта зебра буйлап юл аша чыгып барган кызны бәрдергән. Бу хакта шәһәр Дәүләт автоинспекциясеннән хәбәр иттеләр.

Чаллыда сәүдә үзәгендә янгын чыккан, дип хәбәр иттеләр Россия Гадәттән тыш хәлләр министрлыгының ТР буенча Баш идарәсе матбугат хезмәтендә.