Новости за 20.02.2020

(Әлмәт, 20 февраль, «Татар-информ», «Әлмәт таңнары»). Норвегия нефтьчеләренең профсоюз вәкилләреннән торган делегация тәүге тапкыр Әлмәттә булды. Сәфәрнең максаты «Татнефть» компаниясенең профсоюз оешмасы эшчәнлеге, хезмәтне саклау һәм сәнәгать куркынычсызлыгы белән танышу иде. Бу турыда район басмасы хәбәр итә.

(Казан, 20 февраль, «Татар-информ», Гөлия Хәсбиуллина). Бүген Казанның «Ак Барс» хоккей командасы Мәскәүдә «Спартак» командасына каршы уйнады. Казан хоккейчылары 6:3 исәбе белән оттырды.

(Чирмешән, 20 февраль, «Татар-информ», «Безнең Чирмешән», Гөлсирә Шәрифуллина). Чирмешән лицее базасында әти-әниләр бердәм дәүләт имтиханы тапшырып карадылар. Имтиханда барлыгы 46 кеше катнашты. Бу турыда район басмасы хәбәр итә.

(Казан, 20 февраль, «Татар-информ»). Спас районында автомобильгә иптәшләрен утыртып бозга кергән балыкчыга штраф салганнар. Бу турыда Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.

(Казан, 20 февраль, «Татар-информ»). Эш бирүченең хезмәт хакын индексацияләү бурычы Хезмәт кодексында каралган, әмма тәртибе төгәл язылмаган. Бу турыда РИА Новости «Хезмәт законнары һәм цифрлаштыру: яңа мәсьәләләр һәм перспективалар» конференциясендә Россия Хезмәт һәм мәшгульлек федераль хезмәте законнарының үтәлешен күзәтү бүлеге башлыгы Александр Турков хәбәр итте.

(Казан, 20 февраль, «Татар-информ»). Татарстан депутат йорт тирәсен чистартканда карны юлга ташлаган. Ул шул юлдан чыга алмаган машина йөртүченең борынын сындырган. Бу турыда РФ Тикшерү комитетының ТР буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итә.

(Казан, 20 февраль, «Татар-информ»). Россиянең «КАМАЗ-мастер» командасы турындагы сериалның беренче өлеше 2020 елның 30 августында — Республика көнендә телеэкраннарга чыгачак. Бу хакта команда җитәкчесе, ТР Дәүләт Советы депутаты Владимир Чагин хәбәр итте.

(Казан, 20 февраль, «Татар-информ»). Россия Дәүләт Думасы ана капиталы программасын киңәйтү турындагы закон проектын кабул итте. Документ «Бердәм Россия» фракциясе тарафыннан әзерләнеп, парламентның түбән палатасына тапшырылган. Бу хакта партиянең мәгълүмат үзәге хәбәр итә.

(Казан, 20 февраль, «Татар-информ»). ТР Президенты Рөстәм Миңнеханов Салих Сәйдәшев исемендәге Зур концерт залында Ватанны саклаучылар көненә багышланган концертта булды һәм 16 ветеранны медальләр белән бүләкләде.

(Казан, 20 февраль, «Татар-информ»). 22 яшьлек казанлы Авелина Назарова Балида ял иткәндә суда батып үлгән. Бу мәгълүматны jawapos басмасы раслый.

(Казан, 20 февраль, «Татар-информ», Гөлүзә Ибраһимова). Ш.Мәрҗани исемендәге Тарих институтында Япония татар диаспорасы тарихы белән бәйле документларны Дәүләт архивына тапшырдылар.

(Казан, 20 февраль, «Татар-информ», Рузилә Мөхәммәтова). Язучы Галимҗан Гыйльманов татар теле һәм әдәбияты буенча төзелгән дәреслекләргә яңа гасырда иҗат иткән язучыларның әсәрләрен кертергә киңәш итте. Әлеге фикерен ул Тел, әдәбият һәм сәнгать институтының яңа проектларын җәмәгатьчелеккә күрсәтү чарасында җиткерде.

(Казан, 20 февраль, «Татар-информ», Рузилә Мөхәммәтова). Г.Ибраһимов исемендәге Тел, әдәбият һәм сәнгать институты галимнәре башлангыч сыйныфларга татар телен укыту өчен яңа буын татар теле дәреслеген тәкъдим итте. Институтның яңа проектларын тәкъдим итү чарасы Туган тел көне уңаеннан оештырылган иде.

(Казан, 20 февраль, «Татар-информ», Гөлнар Гарифуллина). ТР Премьер-министры урынбасары Ләйлә Фазлыева Министрлар Кабинетында Бөек Ватан сугышында Җиңүнең 75 еллыгына әзерлек һәм аны бәйрәм итүне оештыру комитеты утырышында ветераннарның яшәү шартларын яхшыртуда алдынгы һәм калышучы районнарны атады.

(Казан, 20 февраль, «Татар-информ», Гөлнар Гарифуллина). Татарстан Дәүләт Киңәшчесе Минтимер Шәймиев ТАССР 100 еллыгын бәйрәм итү һәм 9 Май якынча бер вакытка туры килүен, шуңа Татарстанда бизәлеш уйлап эшләнергә тиешлеген әйтте. Бу фикерен ул Министрлар Кабинетында Бөек Ватан сугышында Җиңүнең 75 еллыгына әзерлек һәм аны бәйрәм итүне оештыру комитеты утырышында җиткерде.

(Казан, 20 февраль, «Татар-информ», Гөлнар Гарифуллина). Бөек Ватан сугышында Җиңүнең 75 еллыгы юбилей медальләре ветераннарга югары дәрәҗәдә тапшырылырга тиеш. Татарстан Президенты Рөстәм Миңнеханов Министрлар Кабинетында Бөек Ватан сугышында Җиңүнең 75 еллыгына әзерлек һәм аны бәйрәм итүне оештыру комитеты утырышында шул хакта кисәтте.

(Казан, 20 февраль, «Татар-информ», Наталья Рыбакова). Бүген Татарстанда әле күптән түген генә оештырылган «Идел киңлекләре» тыюлыгы территориясендә тәүге рейд үткәрелде. Чарада Росприроднадзорның Идел-Кама төбәкара идарәсе, Казан районара табигатьне саклау прокуратурасы, ТР Экология һәм табигый ресурслар министрлыгы белгечләре катнашты.

(Казан, 20 февраль, «Татар-информ»). Соңгы ел ярым эчендә Казанда «Цифрлы икътисад» илкүләм проекты буенча күп функцияле үзәкнең алты бүлеге үз ишекләрен ачкан. Татарстанның Күп функцияле үзәге директоры Ленара Мозаффарова йомгаклау киңәшмәсендә шул хакта хәбәр итте.

(Казан, 20 февраль, «Татар-информ»). Татарстанның Лаеш районында юлга йөгереп чыккан пошиларны видеога төшергәннәр. Бу фотолар социаль челтәрләрдә чыкты.

(Казан, 20 февраль, «Татар-информ»). Чүпрәле районында, шәхси йортта янгын чыгып, 62 яшьлек ир-атның гомере өзелгән. Бу хакта Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

(Казан, 20 февраль, «Татар-информ», Гөлнар Гарифуллина). Татарстан Республикасының Дәүләт Советы депутаты Рамил Төхвәтуллин халык санын исәпкә алу алдыннан, татарлар кимү куркынычы янаганын искәртеп, парламент утырышында тәкъдимнәре белән чыгыш ясады.

(Казан, 20 февраль, «Татар-информ»). 2020 елда Татарстанның күп функцияле үзәкләре «Цифрлы икътисад» илкүләм проекты буенча 26 яңа хезмәт күрсәтә башлаячак. Бу хакта оешманың йомгаклау киңәшмәсендә Татарстанда күп функцияле үзәк директоры Ленара Мозаффарова хәбәр итте.

(Казан, 20 февраль, «Татар-информ»). Бәйрәм алдыннан эш бирүче инициативасы буенча бирелгән өстәмә ял көннәре түләнергә тиеш. Бу хакта Россия Хезмәт һәм мәшгульлек федераль хезмәте Ватанны саклаучылар көне һәм Халыкара хатын-кызлар көне алдыннан искә төшерә. Бу турыда «Российская газета» яза.

(Казан, 20 февраль, «Татар-информ»). ТР Тикшерү комитеты депутатның туганнарына законсыз рәвештә дүрт җир участогы рәсмиләштерүендә шикләнә. Бу турыда РФ Тикшерү комитетының ТР буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итә.

(Казан, 20 февраль, «Татар-информ»). Иртәгә, 21 февральдә, 13.00 сәгатьтә Казан Кремленең Ислам мәдәнияте музеенда Ибраһим Идриснең «Тәрбияле ата» китабының яңа басмасы тәкъдим ителәчәк.Бу хакта ТР Диния нәзарәте матбугат хезмәте хәбәр итә.