Сыхлăх эмелне яртармалла

Кăшăллă вирус каллех вăй илсе пырать. Икĕ эрне каялла кăшăллă вируспа чирлекенсене талăкра 27 çын таран шута илнĕ пулсан, юлашки кунсенчи кăтарту 57-60-па танлашать. «Ковид-19» диагноз лартнисем чире çăмăллăн парăнтараççĕ. Йăшнисенчен ытларахăшĕ килтех сипленет. Республика ертӳçи ертсе пыракан ларура тĕп ыйтусене сӳтсе явиччен çакăн пирки калаçрĕç. Çулла çитсен кăнтăр тăрăхĕсенелле каякансем нумайланаççĕ. Краснодартан, Крымран канса килекенсем Чăваш Енре те йышланнă. Çакă кăтарту пысăкланнин сăлтавĕсенчен пĕри пулнине палăртрĕç ларура. Раççей сывлăх сыхлавĕн министерстви авăн уйăхĕнче вируслă чирсемпе аптăракансем нумайланасси пирки асăрхаттарать. Çанталăк сивĕтни чир-чĕре алхасма май парать. Кĕркунне шур халатлисем «Ковид-19» диагноз та час-час лартаççĕ. Апла пулсан кун пирки паянах шухăшламалла. Вакцинаци – чиртен сыхланмалли ăнăçлă мелсенчен пĕри пулнине палăртрĕ Чăваш Республикин Пуçлăхĕ Олег Николаев. Паян регионта «Спутник-Лайт» вакцина 700-е яхăн доза таранах пур. Ытти вакцина та çителĕклĕ. «Сыхлăх эмелне яртаракансен йышĕ пысăклансан ăна тата та илсе килĕпĕр», – терĕ Олег Алексеевич