Вајгл: Неприфатливо е Франција да блокира и да ја срами ЕУ

Поранешниот словенечки пратеник во Европскиот парламент Иво Вајгл денеска изјави дека одлуката на ЕУ за неотворање на преговорите со Северна Македонија е катастрофална и со неа се поткопува кредибилитетот на Унијата.

„Би рекол дека ова едноставно е измама. Ова не е прифатливо за која било земја дури и за Франција, да блокира ваква работа против желбите на сите, дури и ја засрамува Европската унија“, изјави Вајгл во интервју за Еуропијан Вестерн Балканс.

Вајгл кој беше известувач за земјава во периодот од 2014 до 2019 година порача и дека Договорот од Преспа е еден од ретките позитивни случаи кога еден сложен политички проблем бил решен на демократски начин.

„И некој сега тоа го фрли во корпа за отпадоци и ги обезвредни напорите на овие државници, со што потврди дека оние кои беа против овие договори се во право“, смета Вајгл.