მოსკოვის სასამართლომ ორთვიანი პატიმრობის განაჩენი გამოუტანა ყოფილ მინისტრ მიხეილ აბიზოვს
მოსკოვის სასამართლომ დააკმაყოფილა გამოძიების შუამდგომლობა ყოფილი მინისტრის, მიხეილ აბიზოვის ორი თვით დაპატიმრების თაობაზე 62 მილიონი დოლარის მიტაცებაში ეჭვმიტანის საფუძველზე.
თავად ექს-მინისტრი ბრალდებას კატეგორიულად უარყოფს. სასამართლოზე მან განაცხადა, რომ არც კი შეუძლია ილაპარაკოს ბრალდებებზე მათი „ბუნდოვანი ფორმულირებების“ გამო.
ღია მმართველობის საკითხთა ყოფილი მინისტრი 25 მარტს დააკავეს უშიშროების ფედერალური სამსახურის აგენტებმა.
გამოძიების ვერსიით, აბიზოვის სახელს უკავშირდება ოთხ მილიარდამდე რუბლის მიტაცება ორი ღია სააქციო საზოგადოებიდან და ფულის საზღვარგარეთ გატანა, რითაც აბიზოვმა და სხვა ბრალდებულებმა „საფრთხე შეუქმნეს რუსეთის მთელი რიგი რეგიონების მდგრად ეკონომიკურ განვითარებასა და ენერგეტიკული უსაფრთხოებას“, - იუწყება საინფორმაციო სააგენტო „რია ნოვოსტი“ გამოძიების ვერსიაზე დაყრდნობით.
ცნობების თანახმად, ბოლოხანს აბიზოვი, რომელმაც მთავრობა დატოვა პრეზიდენტად ვლადიმირ პუტინის მეოთხე ვადით არჩევის შემდეგ, იტალიაში ცხოვრობდა.
აბიზოვი ხელმძღვანელ თანამდებობებზე მუშაობდა მსხვილ ენერგეტიკულ და რესურსების მომპოვებელ კომპანიებში. 2012-2018 წლებში ეკავა ღია მმართველობის საკითხთა მინისტრის პოსტი. საპრეზიდენტო არჩევნების შემდეგ ეს თანამდებობა გაუქმდა და აბიზოვი ვეღარ მოხვდა მთავრობის შემადგენლობაში.
გამოცემა "ფორბსის" მონაცემებით, ყოფილი მინისტრი უმდიდრესი რუსების რიცხვშია. ამჟამად მისი ქონება 600 მლნ დოლარად არის შეფასებული.