ბრიტანეთის მთავრობა დღეს მართავს შეხვედრას, რომელმაც შესაძლოა, განსაზღვროს ბრექსიტის ბედი
25 მარტის შეხვედრაში მონაწილეობენ კაბინეტის წევრებიც, რომლებიც, ცნობების თანახმად, ტერეზა მეის გადადგომას ემხრობიან. მთავრობამ უნდა განიხილოს „საორიენტაციო კენჭისყრების“ საკითხი ბრექსიტის გარშემო ჩიხიდან გამოსასვლელად.
საორიენტაციო კენჭისყრები ნიშნავს, რომ პარლამენტარებმა უნდა გამოხატონ თავიანთი დამოკიდებულება სხვადასხვა საკითხზე, რათა გამოიკვეთოს თემთა პალატის პოზიცია ერთ თემასთან, ამ შემთხვევაში ბრექსიტთან, დაკავშირებულ სხვადასხვა ვარიანტზე.
საორიენტაციო კენჭისყრებს დღესვე, მოგვიანებით შესთავაზებენ კანონმდებლებს.
ბრიტანეთის მედიის თანახმად, საორიენტაციო კენჭისყრებზე დაისმება შეკითხვები, როგორიცაა ემხრობით თუ არა ევროკავშირთან მეის შეთანხმებას, ან ბრექსიტს შეთანხმების გარეშე, ან ბრექსიტზე უარს, ან მეორე რეფერედნუმს.
ევროკავშირმა ტერეზა მეის მისცა ვადა 12 აპრილამდე პარლამენტარების დასარწმუნებლად, მხარი დაუჭირონ შეთანხმებას, რომელსაც პრემიერ-მინისტრმა ბრიუსელთან მიაღწია, ან გამონახოს ალტერნატივა, რომელიც შესაძლოა ითვალისწინებდეს ევროკავშირიდან ბრიტანეთის გასვლის გადავადებას.
თუ მეი მოიპოვებს პარლამენტის მხარდაჭერას თავისი გეგმისათვის, რომელიც უკვე ორჯერ იქნა უარყოფილი, მაშინ ბრიტანეთი 22 მაისს გავა ევროკავშირიდან.
ბრიტანეთში 2016 წელს გამართულ რეფერენდუმში მხარი დაუჭირეს ევროკავშირიდან გასვლას, მაგრამ მეის გუნდმა ბრიუსელთან მოლაპარაკების პროცესში ვერ მიაღწია შეთანხმებას, რომელსაც ლონდონში პარლამენტი დაამტკიცებდა.