ჯანდაცვის სამინისტრო: იგეგმება სოცმუშაკებისთვის ხელფასების ზრდა
„საშუალოვადიან გეგმებში სოციალური მუშაკებისთვის იგეგმება ხელფასის გაზრდა“, - აცხადებს ჯანდაცვის სამინისტროს სოციალური დაცვის დეპარტამენტის ხელმძღვანელი ნინო ოდიშარია.
მისი თქმით, სამინისტრო აქტიურად მუშაობს სოციალური მუშაკების პრობლემების მოსაგვარებლად.
„ჩვენ გავაკეთებთ ყველაფერს, რათა სოციალური მუშაკების გაფიცვის დროს ჩვენი ბენეფიციარები არ დაზარალდნენ და მათ სიცოცხლეს, ჯანმრთელობას არ შეექმნას საფრთხე. გავაკეთებთ მობილიზაციას იმ რესურსების და თანამშრომლების, რომლებსაც ჩავრთავთ გადაუდებელ რეჟიმში. აღსანიშნავია, რომ ინფრასტრუქტურული პროექტები უკვე დაწყებულია: ზოგან დასრულდა,ზოგან ისევ მიმდინარეობს რემონტი. ყველა რეგიონს დაუმატეს ერთი მანქანა და შემდგომში კიდევ დაემატება. ასევე, ჩამოაშორეს ადმინისტრაციული საქმეები სოციალურ მუშაკებს, რადგან მათი განტვირთვა მოხდეს. შემდეგ კვირაში იგეგმება სპეციალისტების ტრენინგება. ჩვენ გვყავს შიდა საბჭოც, სადაც სოციალური მუშაკებიც არიან ჩართული. სამოქმედო გეგმას ამ საბჭოსთან ერთად მივყვებით, მათ ვაბარებთ ანგარიშს, ისინი გვთავაზობენ წინადადებებს” - განაცხადა ნინო ოდიშარიამ.
25 მარტს სოციალური მუშაკები ქვეყნის მასშტაბით გაფიცვას გეგმავენ. ისინი სამუშაო პირობების გაუმჯობესებას ითხოვენ.