ბი-ბი-სი: ტერეზა მეი ევროკავშირს სთხოვს ბრექსიტის 30 ივნისამდე, ან უფრო გვიან გადატანას
ბრიტანეთის სამაუწყებლო კორპორაცია ბი-ბი-სი-ს ცნობით, პრემიერ-მინისტრი ტერეზა მეი ევროკავშირს სთხოვს ბრექსიტის 30 ივნისამდე გადავადებას და ევროკავშირიდან გასვლის უფრო გვიანი თარიღის შერჩევის შესაძლებლობას ბი-ბი-სი ეყრდნობა თავის წყაროებს ბრიტანეთის მთავრობაში.
ბრექსიტის თარიღად განსაზღვრულია 29 მარტი, მაგრამ გასულ კვირაში თემთა პალატის წევრებმა მხარი დაუჭირეს ევროკავშირიდან ქვეყნის გასვლის გადავადებას.
ბრიუსელი აცხადებს, რომ ბრექსიტის გადადება დაუშვებელია ბრიტანეთის მთავრობის კონკრეტული გეგმის გარეშე. გარდა ამისა, ბრექსიტის გადავადებისათვის საჭროა ევროკავშირის ყველა წევრის თანხმობა.
ტერეზა მეი აცხადებს, რომ გადავადებაზე ბრიუსელის თანხმობის შემთხვევაში, გააგრძელებს მუშაობას ბრექსიტის გეგმის დასამტკიცებლად.
გასულ კვირაში ბრიტანელმა დეპუტატებმა ისევ უარყვეს მეის გეგმა. ამას გარდა, პარლამენტმა უარი თქვა ევროკავშირიდან შეთანხმების გარეშე გასვლაზე და მხარი დაუჭირა ბრექსიტის გადავადებას.
დიდ ბრიტანეთში 2016 წელს გაიმართა რეფერენდუმი ევროკავშირიდან ბრიტანეთის გასვლის შესახებ. ბრექსიტს მიემხრო კენჭისყრის მონაწილეთა 51,89% (17,4 მლნ ადამიანი). წინააღმდეგი იყო 48,11%, ანუ 16,1 მლნ.