მამუკა ბახტაძე: დიდია ევროკავშირის დახმარება ექსპორტის ხელშეწყობაში
ევროკავშირის დახმარებით შემუშავდება იმ ახალი პროდუქტების სია, რომლებიც მომავალ წლებში გავა ევროპის ბაზარზე, - განაცხადა საქართველოს პრემიერ-მინისტრმა, მამუკა ბახტაძემ ვაჭრობის საკითხებში ევროკომისართან, სესილია მალმსტრომთან შეხვედრის შემდეგ გამართულ ერთობლივ პრესკონფერენციაზე.
პრემიერის თქმით, საამაყოა, რომ ევროკავშირის ბაზარზე საქართველოს სახელით არის წარმოდგენილია 800-მდე კომპანია და მიმდინარეობს მუშაობა საექსპორტო პოტენციალის განვითარების მიმართულებით.
„უკვე 800-მდე ქართული კომპანიაა წარმოდგენილი ევროპის ბაზარზე. ისინი ყიდიან ქართულ პროდუქციას წარწერით „მეიდ ინ ჯორჯია“ (Made in Georgia), რაც არის განსაკუთრებით საამაყო და მე მინდა, თითოეულ ამ კომპანიას გადავუხადო განსაკუთრებული მადლობა.
ჩვენს მეწარმეებს ეზრდებათ მოტივაცია, რომ აწარმოონ უფრო მაღალი ღირებულების ეკოლოგიურად სუფთა პროდუქცია. ევროკავშირის მაღალ სტანდარტებს აკმაყოფილებს და უკვე შეგვიძლია ევროკავშირის ბაზარზე გავიტანოთ ქართული თაფლი და შავი ზღვის თევზი.
ევროპელ პარტნიორებთან ერთად ვმუშაობთ პროდუქციის ახალ სიაზე. ეს არის იმ პერსპექტიული პროდუქციის სია, რომლებიც მომავალ წლებში უნდა გავიტანოთ ევროპის ბაზარზე.
ამასთან ერთად, ევროკომისიის დახმარებით ჩვენ შევიმუშავეთ საქართველოს ექსპორტის განვითარების სტრატეგია, რომელიც მოიცავს კონკრეტული პროდუქტების ევროკავშირის ბაზარზე განთავსების სამოქმედო გეგმას.
ვფიქრობ, ეს არის სწორი მიდგომა, რომ ჩვენ გვქონდეს ექსპორტის განვითარების არა ზოგადი სტრატეგია, არამედ სამოქმედო გეგმა თითოეული პროდუქტის მიხედვით“, - განაცხადა საქართველოს პრემიერ-მინისტრმა.
მამუკა ბახტაძემ ქართველი ხალხის სახელით ევროკავშირს დახმარებისთვის მადლობა გადაუხადა.