Нохчийчу шайн тергамчаш ца бохуьйту "Яблоко" партино
"Тхуна хетарехь, оцу бахархошна, тергамчаш санна Нохчийчу ховсийначарна, кIорггера хууш дац, регионехь долчу сингаттамечу хьолах. Халахеташ делахь а, кест-кеста стеган дахарна кхераме мIаьргонаш хIуьтту цигахь, къаьсттина хаарш доцчунна а, зеделларг доцуш и стаг велахь а. Навальныйн штабо лерина тренингаш ца йина цаьрца, уьш "шайн лаамехь" боьлхуш бу алар доцург, ца дуьйцу журналисташка, муха ларйийр йолуш ю церан кхерамзалла", аьлла бу хаам.
Маршо Радионо хьалхо яздинера, Навальный Алексейс Нохчийчу 53 тергамча хьажош хиларх. Оьшуш долу царна кехаташ Оьрсийчоьнан президентан харжамийн кандидатийн Явлинский Григорийн а, Грудинин Павелан а тешаша делла хилар а хоуьйтуш.
"Новая газетано" Оьрсийчоьнан омбудсмене Москалькова Татьяне а, адамийн бакъонашкахула йолчу Кхеташонан (СПЧ) куьйгалхочуьнга Федотов Михаиле а хаамбира, тергамчаш Нохчийчу боьлхуш хиларх.
Нохчийчуьрчу Оьрсийчоьнан президентан харжамашка кеп-кепарчу политикан ницкъаша шайн тергамчаш бахийта лаам хиларх вистхилла Кадыров Рамзан.
"Массарна а хаа луург, Навальный Алексейс Нохчийчу "шен нах" бахкийтар оха тIе муха эцна. Суна ца хаьа, муьлхачу статусехь бу и нах, амма харжамашна тIехь терго латто луург массо а, ша Навальный а, "цуьнан нах" а, Iамеркера, Европера а цхьана тергамчаш оха кхойкхуш бу тхайн республике кIирандийнахь", - аьллера Кадыровс.