Миңнеханов Казан аграр университетына 100 ел тулу уңаеннан курсташлары белән очрашты
Бүген Татарстан Республикасы Президенты Рөстәм Миңнеханов Казан аграр университетының 100 еллыгы уңаеннан курсташлары белән очрашты. Бу хакта ул үзенең Telegram-каналында язган.
«Быел минем Аграр университетыма 100 ел. Бүген курсташлар белән очраштык. Студент елларын, иң яхшы вакытны искә төшердек!» – дип язган Татарстан Президенты.
Фото: © https://t.me/rustamminnikhanov
Казан дәүләт аграр университеты 1922 елның 22 маенда Политехник институтның (хәзерге КНИТУ-КХТИ) авыл хуҗалыгы факультетын һәм Казан университетының урман факультетын берләштерү юлы белән оештырыла.
Башта югары уку йорты Казан авыл хуҗалыгы һәм урманчылык институты дип атала. 1995 елда академия статусына, 2006 елда университет статусына ия була.
Рөстәм Миңнеханов Казан авыл хуҗалыгы институтын «авыл хуҗалыгын механикалаштыру» белгечлеге буенча 1978 елда тәмамлаган.