Новости за 26.05.2022

Бүген Түбән Камада Химик көнен билгеләп үттеләр. Тантаналы чаралар традиция буенча митингтан һәм Николай Васильевич Лемаев бюстына чәчәкләр салудан башланды.

Марий Эл республикасының Йошкар-Ола шәһәрендә «Шома Бас» дип исемләнгән V Халыкара бию фестиваль-конкурсы узды. Бу турыда Бөтендөнья татар конгрессы хәбәр итә.

Биш сәгатьлек бәйрәм концерты «Татнефть Арена»да бара.

Татарстан Президенты Рөстәм Миңнеханов Түбән Камада Химиклар көнен бәйрәм итүдә катнашты. Ул нефть химикларына республика үсешенә керткән өлешләре өчен рәхмәт белдерде.

Башкортстан археологлары моңа кадәр билгеле булмаган дүрт археология һәйкәлен ачыклаган. Бу – «Якты-1», «Якты-2», «Якты-3» авыллары урыны һәм «Тугай-1» җирлеге. «Башинформ» шул турыда яза.

Татарстан районнарында кече хуҗалыклар эшенең нәтиҗәлелеген арттыру өчен резервлар бар. Бу хакта Татарстанның Дәүләт Советы Рәисе Фәрит Мөхәммәтшин Чирмешән районында узган зона киңәшмәсендә белдерде, дип хәбәр итә республика парламентының матбугат хезмәте.

Иртәгә Татарстан Милли китапханәсендә 13:30 сәгатьтә «Олуг китап» күргәзмәсе ачыла. Күргәзмә Идел буе Болгар дәүләтендә ислам динен кабул итүнең 1100 еллыгына багышлана. Бу турыда Татарстан Диния нәзарәте хәбәр итте.

Татарстан Республикасының Россия Федерациясендәге Тулы вәкаләтле вәкиллегендә Индонезиянең Россия Федерациясендәге Илчелеге делегациясе булды, аның составына илнең бизнес вәкилләре дә керде. Татарстан Республикасының Россия Федерациясендәге Тулы вәкаләтле вәкиллеге шул турыда хәбәр итә.

Иркутск өлкәсенең Усолье Себер шәһәрендә мәчеткә нигез салган бертуганнар – Рафаэль һәм Зигфрид Шакировлар истәлегенә мемориаль такта ачтылар. Россия мөселманнары Дини җыены Үзәкләштерелгән дини оешмасы шул хакта хәбәр итте.

Нефть химиясе сәнәгате – Татарстанның үсеш һәм алгарыш нигезләренең берсе, дип белдерде Татарстан Президенты Рөстәм Миңнеханов «Түбән Кама нефть химиясе»нең Боз сараенда.

Санкт-Петербург шәһәрендә «Салават күпере» дип исемләнгән XXIII Халыкара фестиваль үтәчәк. Ул 25 майдан 31 майга кадәр уздырыла, дип хәбәр итә Татарстан Республикасының Санкт-Петербург шәһәрендәге һәм Ленинград өлкәсендәге Даими вәкиллеге.

Татарстан Президенты Рөстәм Миңнеханов «Казан вертолет заводы» акционерлык җәмгыяте коллективы белән очрашты. Ул инженерларны һәм эшчеләрне эш темпларын арттырырга өндәде.

Тинчурин театры Габдулла Тукайның әдәби музее белән берлектә драматурглар өчен «Софт татарча» театр лабораториясен башлап җибәрә. Драматургларның беренче очрашуы һәм робот белән танышуы 31 май көнне Габдулла Тукайның әдәби музеенда узачак.

Бүген Уфа мөселман зиратында күренекле мәгърифәтче, дин эшлеклесе Ризаэтдин Фәхретдин истәлегенә мемориаль комплекс ачу тантанасы узды. Бу турыда Татарстан Республикасы мөселманнарының Диния нәзарәте хәбәр итә.

Татарстан Президенты Рөстәм Миңнеханов Түбән Камада Татарстан Республикасы Хөкүмәте һәм «СИБУР Холдинг» гавәми акционерлык җәмгыяте арасында хезмәттәшлек мәсьәләләренә багышланган киңәшмәдә катнашты.

Казанда ике көнгә 5а номерлы трамвай хәрәкәте маршруты кыскара. Бу Борхан Шаһиди урамында трамвай юлларын күчерү белән бәйле, дип хәбәр итә «Метроэлектротранс»ның матбугат хезмәте.

Казанның Завойский урамында җәяүлеләр һәм автомобиль транспорты өчен хәрәкәт вакытлыча чикләнәчәк. Бу хакта Казан мэриясе порталы хәбәр итә.

«Уен кагыйдәләрен үзгәртеп, әллә ниләр уйлап чыгарасы юк. Бер яктан, эшмәкәрләрне инвестиция кертергә өндибез, икенче яктан, чикләүләр кертәбез», - дип шелтәләде Президент.

Җәй көне Казан аэропортыннан Төрмәнабадка даими рейслар ачыла һәм Ашхабадка яңадан очкычлар оча башлый. Бу хакта аэропортның матбугат хезмәте хәбәр итә.

«Республика халкын төрле төбәкләрдә терлекләрдә булган йогышлы авыру кертүдән саклыйсыбыз килә», - диде Габделхак Мотыйгуллин.

Спортның катнаш көрәш төрендә чыгыш ясаучы Татарстан вәкиле Ринат Фәхретдинов UFC тагы дебют көрәшенә түбәтәй киеп чыгачак. «Гладиатор» кушаматлы спортчы үзенең телеграм-каналында шул хакта хәбәр итә. 

Татарстан Сәламәтлек саклау министрлыгы сайтында «Ел табибы - Ак чәчәкләр 2022» бәйгесе номинантлары өчен тавыш бирү башланды. Бу хакта министрлыкның матбугат хезмәте хәбәр итә.

«Хәзерге көндә корбан чалуны тәкъдим итүчеләрнең саны артты, бу проблема күтәрелмәс дип уйлыйбыз», - диде хәзрәт.

Җомга көнне, 27 майда, Татарстан территориясендә һава шартларының начараюы көтелә.

ТР Премьер-министры урынбасары – икътисад министры Мидхәт Шаһиәхмәтов республика эшмәкәрләрен Россия эшкуарлары көне белән котлады.