Новости за 12.11.2023

Нурлатта Әхмәтзәки хәзрәт Сафиуллин исемендәге тәгълим үзәге каршында татар блогерлык мәктәбе ачылды. Бу хакта «Нурлат-информ» хәбәр итә.

Районнар буенча эш сәфәре барышында Бөтендөнья татар конгрессы Башкарма комитеты җитәкчесе урынбасары, Татарстандагы бүлекчәләр белән эшләү комитеты җитәкчесе Ирек Шәрипов Минзәлә районында булды. Бу хакта «Минзәлә» сайтында хәбәр ителә.

Чирмешән районында агымдагы елның 10 аенда 7557 квадрат метр торак файдалануга тапшырылган. Шулай итеп, 2023 елгы план 126 процентка үтәлгән. Бу хакта «Безнең Чирмешән» сайтында хәбәр ителә.

Бөгелмә районы башлыгы Линар Закиров хәрбиләргә «Батырлык өчен» медальләрен тапшырды. Махсус хәрби операциядә катнашучылар — ефрейтор Таһир Рәхмәтов һәм кече сержант Денис Зәкиев югары бүләкләргә лаек булды. Бу хакта «Бөгелмә авазы» хәбәр итә.

Бүген, 12 ноябрьдә, Балтач районы Салавыч Сәрдегәне авылында яңартылган мәчет ачу тантанасы узды. Бу хакта ТР Диния нәзарәте матбугат хезмәте хәбәр итә.

Финляндиянең чик буе хезмәте Россиядән велосипедларда илгә керүне чикли башлаган. Россиянең Төньяк-Көнбатыш таможня идарәсе матбугат хезмәтендә әлеге мәгълүматны расладылар. Бу хакта ТАСС агентлыгы хәбәр итә.

Татарстанда киләсе атна башында бозлавык һәм томан көтелә, урыны белән явым-төшем күзәтелергә, көчле җил чыгарга мөмкин. Бу хакта ТР Гидрометеорология һәм әйләнә-тирә мохитне күзәтү идарәсе сайтында хәбәр ителә.

Татарстан башкаласы Россиядә яшәүчеләр ноябрь аенда балалары белән сәяхәт итү өчен сайлаган иң популяр биш шәһәр арасына керде. Сәяхәтләрне оештыру өчен OneTwoTrip сервисы мәгълүматлары шуны раслый, дип хәбәр итә РИА Новости агентлыгы.

Татарстанның Алабуга районы махсус хәрби операция башланганнан алып анда катнашучыларга, шулай ук Россиянең яңа төбәкләрендә яшәүчеләргә 209 тонна гуманитар йөк озатты. Акчага күчереп исәпләгәндә бу 253 миллион сум дигән сүз. Бу хакта «Татар-информ» агентлыгына муниципаль берәмлекнең матбугат хезмәтендә хәбәр иттеләр.

Дүшәнбе һәм якын-тирә шәһәрләрнең «Дуслык» Татар-башкорт милли-мәдәни үзәге әгъзалары Россиянең дәүләт бәйрәме – Халыклар бердәмлеге көненә багышланган кичә үткәрде. Бу хакта «Татар-информ» агентлыгы журналистына Берләшкән Дәүләтләр Бердәмлеге, чит илдә яшәүче ватандашлар эшләре һәм халыкара гуманитар хезмәттәшлек федераль агентлыгының (Россотрудничество) Таҗикстандагы вәкиллеге матбугат хезмәтендә хәбәр иттеләр.

Мәктәп укучыларына математика буенча Төп дәүләт имтиханында рәсми рәвештә калькулятор кулланырга рөхсәт иттеләр. Федераль педагогик үлчәнешләр сайтында урнаштырылган имтиханның күрсәтмә версиясендә шулай диелә. Бу хакта «Известия» газетасы яза.

Россиядә эксперт комиссиясе тарафыннан интернет эшчәнлегенә куркыныч тудыра дип табылган VPN-сервислар блокировкаланачак. РФ Цифрлы үсеш, элемтә һәм массакүләм коммуникацияләр министрлыгында «Яңа кешеләр» фракциясенең мөрәҗәгатенә шулай дип җавап бирделәр. Бу хакта РИА Новости агентлыгы хәбәр итә.

РФ Гадәттән тыш хәлләр министрлыгы Россия дипломатлары белән берлектә Газа секторыннан тыныч халыкны эвакуацияләү эшен оештырды. Ведомствоның Telegram-каналында шул хакта мәгълүмат чыкты.

Бүген Казан аэропортында берничә самолетны кире борып җибәрделәр.

Аэропортның матбугат хезмәтендә агентлыкка хәбәр итүләренчә, томан һәм күз күреме начар булуы аркасында Ош, Мәскәү һәм Екатеринбургтан Казанга юл тоткан самолетлар Түбән Новгородтагы запас аэродромга китте.

Искәртеп узабыз, хәзер «Казан» аэропорты гадәти режимда эшли.

«Запас аэродромга китү карарын экипаж командиры кабул итә», – дип өстәделәр аэропортта.

Татарстанның халык шагыйре, Габдулла Тукай исемендәге Дәүләт премиясе лауреаты Роберт Миңнуллинның тууына 75 ел тулу уңаеннан Мәскәү Татар мәдәнияте үзәге иҗат коллективлары һәм артистлары концерт оештырды. Бу хакта Мәскәү шәһәре татар милли-мәдәни автономиясе төбәк иҗтимагый оешмасының матбугат хезмәте хәбәр итә.

Россия Гадәттән тыш хәлләр министрлыгының ТР буенча Баш идарәсендә республика юлларында томан куркынычы турында кисәттеләр.

Габдулла Тукай исемендәге татар дәүләт филармониясендә Yummy Music Band төркеме Илһам Шакиров җырларыннан торган концерт куйды. Концертта җырчы репертуарында булган танылган җырларны заманча яңгырашта тәкъдим иттеләр.

12-14 ноябрьдә Бөтендөнья татар конгрессы Татарстан Республикасы Мәгариф һәм фән министрлыгы белән берлектә Казанда I Бөтенроссия туган тел форумын оештыра. Бу хакта Бөтендөнья татар конгрессының матбугат хезмәте хәбәр итә.

31 октябрьдән 7 ноябрьгә кадәр Россиянең 51 төбәгендә бензин бәясе кимегән. Татарстанда исә ул бер атна элеккеге дәрәҗәдә калган. Росстат сайтында шул хакта хәбәр ителә.

2023 елда студент отрядларының Татарстан төбәк бүлеге илдә иң яхшысы дип табылды. Нәтиҗәләрне Казанда узган Бөтенроссия студент отрядлары слетында игълан иттеләр. ТР Рәисе Рөстәм Миңнеханов татарстанлыларны әлеге җиңү белән котлады.

Татарстанда быелның сигез аенда туберкулез йоктыруның 604 очрагы ачыкланган. Татарстанстат мәгълүматларыннан күренгәнчә, бу узган елның шул чоры белән чагыштырганда 95,6 процентка күбрәк.

Чечня Республикасы башлыгы Рамзан Кадыровның олы улы – 18 яшьлек Әхмәт Кадыров Чечня Республикасы физкультура, спорт һәм яшьләр сәясәте министрының беренче урынбасары булды. Әтисе үзенең Telegram-каналында улының яңа вазифасын телгә алган.

Әмирхан Еники әсәрләре буенча төшерелгән «823 километр» фильмы Беларусьның иң зур кинофорумы – 17-24 ноябрьдә узачак «Листопад» Минск халыкара кинофестиваленең конкурс программасына керде. Бу хакта «Татаркино» сайтында хәбәр ителә.

Татарстанда ноябрьнең икенче декадасында уртача һава температурасы климатик нормадан ике градуска югарырак булачак. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Татарстанда «Төзелеш өчен җир» проектын гамәлгә ашыру барышында төзелеш эшләре алып бару өчен буш җир кишәрлекләре ачыкланган. Бу хакта Дәүләт теркәве, кадастр һәм картография федераль хезмәтенең (Росреестр) ТР буенча идарәсе матбугат хезмәте хәбәр итә.