پر وسلو د کنټرول په اړه د روسیې ولسمشر یو قانون توشیح کړ
ولسمشر ولادیمیر پوتین هغه قانون توشېح کړ چې تطبیق یې په روسیه کې د وسلو پر لرلو کنټرول زیاتوي.
د روسیې پارلمان په یوه ښوونځي کې د ډزو له پروسږنې خونړۍ پېښې وروسته دا لایحه تصویب کړه.
د وسلو د نوي قانون له مخې د وسلو د لرلو لپاره قانوني عمر له ۱۸ کلونو څخه ۲۱ کلونو ته لوړ کړ او همدا راز د وسلو د لرلو لپاره یې یو لړ نور محدودیتونو هم وضع کړي.
له دې مخکې یوازې د جدي جرمونو عاملانو ته د وسلې د لرلو اجازه نه ورکول کېده، خو اوس هغه کسان هم په دې ډله کې ور زیات شوي دي چې د مخدرو موادو د کارولو په تور تر تحقیق لاندې یا محکوم شوي وي.
تېرکال د روسیې د کازان سیمې په یوه ښوونځي کې یوه ۱۹ کلن هلک پر زده کوونکو ډزې وکړې، اووه ماشومان او دوه ښوونکي یې ووژل.
پر وسلو د نوېو محدودیتونو طرح د روسیې د ګارډ مشر ویکتور زولوتوف په مې میاشت کې وړاندې کړه.