د فاریاب چارواکي: طالبانو اندخوی او خان چهارباغ ولسوالۍ نیولي
د اندخوی ولسوال، سلطان محمد سنجر، نن شنبه (د چنګاښ ۵مه) ازادي راډیو ته وویل، دغه ولسوالي تېره شپه تر جګړې وروسته د وسله والو لاس ته ورغله.
د وسله والو طالبانو ویاند ذبیح الله مجاهد هم په یوه ټویټ کې د دې ولسوالۍ د نیولو ادعا کړې ده.
بل خوا په خان چهارباغ ولسوالۍ کې یوې دولتي سرچینې چې نه یې غوښتل نوم یې واخېستل شي، ازادي راډیو ته وویل، وسله والو طالبانو دغه ولسوالي هم نیولې او د امنیې قوماندانۍ ودانۍ ته یې اور اچولی دی.
په بل خبر کې، د پروان امنیه قوماندان تایید کړه چې سیاه ګرد او شینواري ولسوالۍ د وسله والو طالبانو لاس ته ورغلي دي.
مل پاسوال عبدالرووف اروزګاني له ازادي راډیو سره په خبرو کې وویل، دغه ولسوالۍ د لوژستیکي امکاناتو د نشتوالي په سبب د وسله والو طالبانو له خوا ونیول شوه. ده ویلي په سیاه ګرد کې د وسلوالې نښتې پر مهال ۱۸ وسله وال ټپیان شوي.
طالبانو هم په پروان کې د دغو دوو ولسوالیو د نیولو ادعا کړې ده.