د غور شهرک او تولک ولسوالیو بیا نیولو لپاره یو 'تجربهکار جنرال' ورولېږل شو
عبدالظاهر فیضزاده ازادي راډیو ته وویل، د جنرال نور الله قادري په نوم دغه پوځي مشر چې پرون دغه ولایت ته رسېدلی، کولای شي دغه ولسوالۍ بېرته تصفیه کړي.
ښاغلی فیضزاده زیاتوي: "موږ ته له کابله د سوق او ادارې د بهترۍ لپاره جنرال قادري چې مخکې د ۲۰۷ ظفر قول اردو قوماندان او اوس د بګرامۍ فرقې قوماندان دی، د دفاع وزارت لهخوا رالېږل شوی دی. له خلکو او حکومت سره ارتباطات ټینګ شوی او ډېر ژر به شهرک او تولک ولسوالۍ بېرته ونیول شي."
والي وايي دوی تېره اوونۍ د ملکیانو د خوندیتوب لپاره د ساغر ولسوالۍ له مرکز څخه هم خپل پوځیان شاته کړي چې هغه ولسوالۍ به هم بېرته تصفیه شي.
د غور والي عبدالظاهر فیضزاده زیاتوي چې په چهارسده، پسابند او لعل و سرجنګل ولسوالیو کې دا مهال جګړې روانې دي.