Кече Кайбычтагы Дәү әни рецепты буенча гает коймагы

Гает коймагы пешерү рецепты белән бүлешәсем килә. Рецепт бик гади һәм җайлы. Һәр кеше төрлечә итеп пешерә ала, чөнки хәзер рецептлар белән бөтен интернет челтәре тулган.

Ә мин сезгә, Кече Кайбычтагы Дәү әниемнең рецептын тәкъдим итәм. Дәү әниләргә баргач, ул безне шул коймакларын пешереп көтеп тора иде. Хәзер ул юк. Әлеге коймакларны пешереп, аны искә алып чәй эчәбез.

Иң беренче эш итеп, бисмилланы әйтеп эшкә керешәбез.

Кирәк булачак:

1 стакан җылы сөт (катык, әчегән сөт белән дә була);

2 аш кашыгы шикәр комы;

кашык башына чеметем генә тоз;

1 йомырка;

чүпрә 2 бал кашыгы салдым, икенчесе тулыр-тулмас (миндә «Саф момент»чүпрәсе иде, төрле чүпрә ярый).

Һәм он.

Яхшы итеп итеп болгатабыз.

Камырыбыз сыек та, куе да булмасын. Каймак куелыгында гына.

Барысын бергә болгатабыз яхшы итеп, оннар оешып калырга тиеш түгел.

Болгатып бетергәч, җылы урынга ял иттерергә куябыз, ягъни бераз кабартып алабыз.

Камырыбыз кабаргач, җылынган табага, сыек май салып, коймак камырын салабыз. Ике ягын да матур итеп кызартып, чәй эчәргә куябыз.

Мин җәй көне Кошман болыннарында үзем җыйган каен җиләге вареньесын коймак белән чәй эчәргә куйдым.

Чәйләребез тәмле булсын! Илләребез тыныч булсын! Ураза гаете бәйрәме мөбарәк булсын!