Авыл урамында маймыл талаган бала авыр хәлдә реанимациядә ята
Мәскәү өлкәсендәге Терпигорьево авылында 2 яшьлек балага маймыл һөҗүм иткән. Баланың куллары, аяклары яраланган, хәзер ул реанимациядә ята. Бала авыр хәлдә. Бу турыда РЕН ТВ хәбәр итте.
Маймыл хуҗаларыннан качып киткән һәм баланың аягына ябышкан, баскычтан сөйрәп төшергән, аннары җиргә егып салып аркасына атланган да кимерә башлаган. Якында булган балалар куркып качып киткән. Бер хатын сабыйны агрессив маймылдан көч-хәл белән йолып алган. Сабыйны хастаханәгә илткәннәр.
Видеокүзәтү төшереп алган кадрларда маймылның хатынга да һөҗүм итәргә маташуы күренә. Аннары җанварны бер ир-ат куркытып җибәргән. Әле шуннан соң да маймыл кешеләрне эзәрлекләгән, диелә хәбәрдә.
Россия Эчке эшләр министрлыгының Мәскәү өлкәсе буенча идарәсенең матбугат хезмәте җитәкчесе Татьяна Петрова сүзләренчә, җинаять эше ачылган. Ул «Саксызлык аркасында сәламәтлеккә авыр зыян китерү» маддәсе буенча карала.