«Омикрон» хăратать

Кăшăллă вирус алхасма чарăнмасть-ха. Чăваш Енре çак амакпа талăкра 54 çын чирленĕ, 31 çын сывалнă. 14 çын пурнăçне çăлса хăварайман. Çĕршывра ПЦР-тестăн обществăлла вырăнсемпе мероприятисене кĕмелли вăхăтне 72-рен 48 сехете чакарнă. Çакăн сăлтавĕ – ковидăн çĕнĕ «Омикрон» штамĕ. Кăшăллă вирусăн çĕнĕ енĕ хăвăрт ерет. Раççейре 700-е яхăн çын «Омикрон» штамне çаклатнă. Усал амак 13 регионра пур. Хальлĕхе вăл пирĕн республикăна çитмен-ха. Апла пулин те сыватмăшсемпе медицина ĕçченĕсем усалпа кĕрешме тĕплĕн хатĕрленеççĕ. «Омикронăн» тĕп чир уйрăмлăхĕсем: пуç тата пыр ыратать, ӳслĕк, сунас, вăй çукки палăрать. Вăл пысăк хăрушлăх кăларса тăратать: питĕ хăвăрт сарăлать, чирлекен пĕр вăхăтрах 100 çынна çак амака ертме пултарать. ТАТЬЯНА ФЕДОТОВА: «Прививка тунисем çăмăлтарах чирлеççĕ. Çавăнпа прививка тумалла, паллах. Мускаври тухтăрсем каланă тăрăх, çăмăлтарах чирлеççĕ. Европăри данныйсемпе те çăмăлтарах чирлеççĕ, анчах килсессĕн эпир те куратпăр ĕнтĕ. Калама пултараймастăп халь мĕнле пулать пирĕн патра, çавăнпа та прививка тума калатпăр çынсене. Хытах та калатпăр. Пурте тăвасшăн мар. Прививка туманнисем йывăртарах чирлеççĕ. «Омикронпа» мĕнле чирленине те куратпăр ĕнтĕ. Хальлĕхе пулман-ха». Çак усал чир уйрăмах ачасене пырса тивет, мĕншĕн тесен пĕчĕккисем сыхлăх эмелне яртарман, вĕсен иммунитетне хӳтĕлеме май çук. Прививка туни – чăн-чăн çăлăнăç. Çакна кăшăллă вируспа чирлекенсем те çирĕплетеççĕ. ТАТЬЯНА ГАВРИЛОВА: «3 уйăх каялла, авăн уйăхĕнче эпĕ прививка тунă. Ковивак компонентпа. 2 компонент. Прививка тунă хыççăн чир çăмăлрах иртсе кайрĕ тесе шутлатăп. Реанимацине лекмен. Ак кунта лекнĕренпе кислород çинче. Халĕ хама лайăхрах туятăп». Республикăра çак амакпа кĕрешме хатĕр, больницăсенче вырăнсем хатĕрлеççĕ. Енчен те чир алхаса кайрĕ пулсан хушма уйрăмсем йĕркелĕç. Тухтăрсем палăртнă тăрăх, Чăваш Ене «Омикрон» кăрлач уйăхĕн вĕçĕнче çитме пултарать. Елизавета Цветкова, Екатерина Никитко