იორდანეს დასავლეთ ნაპირზე თავდასხმისას მოკლულებს შორის არის პალესტინელი ექიმი
ორი პალესტინელი, მათ შორის ექიმი, მოკლეს 14 ოქტომბერს ისრაელის არმიის მიერ მოწყობილი რეიდისას ქალაქ ჯენინში, ოკუპირებულ ტერიტორიაზე, იორდანეს დასავლეთ ნაპირზე, განაცხადა პალესტინის ჯანდაცვის სამინისტრომ.
აბდულა ალ-აჰმადი „ემსხვერპლა ოკუპანტი (ისრაელელი) ჯარისკაცების მიერ თავში ნასროლი ტყვიით მიყენებულ ჭრილობას", - ნათქვამია სამინისტროს მიერ გავრცელებულ განცხადებაში. ინფორმაციას AFP-ი ავრცელებს.
სამინისტროს წარმომადგენელმა AFP-ს განუცხადა, რომ ქალაქის ლტოლვილთა ბანაკის დარბევისას დაიღუპა ასევე პალესტინელი მატინ დებაია. სამხედრო დაჯგუფება "ჰამასი" დებაიას "მებრძოლად" მოიხსენიებს. სამინისტროს თანახმად, ექიმ აჰმადს ესროლეს ბანაკთან ახლოს მდებარე სამთავრობო საავადმყოფოს გარეთ.
AFP-ს ჟურნალისტის თქმით, სროლის შემდეგ ექიმს სასწრაფო ოპერაცია ჩაუტარდა.
სააგენტო Wafa იტყობინება, რომ პალესტინელთა პრემიერ-მინისტრმა მაჰამად შტაეხმა განაცხადა, რომ გლოვობს ექიმს, რომელიც "ისრაელის ჯარისკაცებმა დახვრიტეს, როცა ის დაშავებულების დახმარებას ცდილობდა".
ისრაელის სამხედროებმა განაცხადეს, რომ "შეიარაღებულმა ეჭვმიტანილებმა გამოიყენეს ასაფეთქებელი მოწყობილობები და მრავალჯერ ისროლეს უსაფრთხოების ძალების მიმართ". "ჯარისკაცებმა შეიარაღებულ ეჭვმიტანილებს მიზნობრივი ცეცხლით უპასუხეს. სამიზნეები იდენტიფიცირებული იყო", - ნათქვამია არმიის განცხადებაში. სამხედროებს ექიმის სიკვდილზე კომენტარი მაშინვე არ გაუკეთებიათ, როცა მათ AFP-ი დაუკავშირდა.
დააკავეს სამი ეჭვმიტანილი, მათ შორის ერთი "ჰამასის" სავარაუდო წევრი, რომელიც, არმიის თქმით, ეჭვმიტანილია ისრაელის ძალებზე თავდასხმებში. 14 ოქტომბერს "ჰამასმა" თავის წევრებს წინააღმდეგობისკენ მოუწოდა.
ისრაელმა აღმოსავლეთ იერუსალიმისა და დასავლეთ სანაპიროს ოკუპაცია 1967 წლის ექვსდღიანი ომის შემდეგ მოახდინა. ბოლო თვეებში ათობით პალესტინელი დაიღუპა ისრაელის თითქმის ყოველდღიური თავდასხმების შედეგად დასავლეთ ნაპირზე. ჯანდაცვის სამინისტროს მონაცემებით, ორი პალესტინელი მოზარდი მოკლეს ქალაქ ჯენინში ჩატარებული ოპერაციისას 9 ოქტომბერს, ხოლო 11 ოქტომბერს 12 წლის ბიჭი გარდაიცვალა გასულ თვეში მიყენებული ჭრილობების შედეგად.
სამხედრო ოპერაციების გაფართოება ჯენინსა და დასავლეთ ნაპირის სხვა რაიონებში მოჰყვა ისრაელელებზე განხორციელებულ სასიკვდილო თავდასხმებს ამ წლის დასაწყისში. ასევე მოხდა შეტაკებები აღმოსავლეთ იერუსალიმში, რომლებშიც მონაწილეობდნენ პალესტინელები, ისრაელის ძალები და მოქალაქეები.
ვაშინგტონმა 12 ოქტომბერს განაცხადა, რომ "პალესტინელებსა და ისრაელელებს შორის დაღუპულთა და დაშავებულთა (რაოდენობის) საგანგაშო ზრდაა, მათ შორის მრავალი ბავშვის". სახელმწიფო დეპარტამენტის წარმომადგენელმა ნედ პრაისმა ორივე მხარეს მოუწოდა, "მიიღონ დაუყოვნებლივი ზომები ადამიანთა სიცოცხლის კიდევ უფრო დიდი დანაკარგების თავიდან ასაცილებლად".