ცხინვალში სამხედრო აღლუმით აღნიშნეს ე.წ. რესპუბლიკის შექმნის 31 წლისთავი
ე. წ რესპუბლიკის შექმნის 31 წლისთავთან დაკავშირებით სამხედრო აღლუმი გაიმართა ოკუპირებულ ცხინვალში, რომელშიც დე ფაქტო შეიარაღებულ ძალებთან ერთად, რუსეთის მეოთხე სამხედრო ბაზის ჯარისკაცებიც მონაწილეობდნენ.
ოსური მედიის ცნობით, 20 სექტემბერს ცხინვალში ჩავიდნენ დელეგაციები რუსეთიდან, სირიიდან, ოკუპირებული აფხაზეთიდან, დონეცკიდან და ლუგანსკის თვითაღიარებული რესპუბლიკებიდან. დე ფაქტო პრეზიდენტმა ანატოლი ბიბილოვმა აღლუმზე შეკრებილ მოსახლეობას მიულოცა: „დღეს სამხრეთ ოსეთი აღნიშნავს სუვერენიტეტის შესახებ დეკლარაციის მიღებიდან 31 წლისთავს. ჩვენი ხალხის ისტორიულ შემობრუნება თავისუფლებისა და დამოუკიდებლობისკენ".
საერთო ჯამში 800-ზე მეტი სამხედრო მოსამსახურე მონაწილელეობდა სამხედრო აღლუმში. ცხინვალში ასევე გაიმართება საზოგადოების საზეიმო შეკრება. ე.წ რესპუბლიკის დღის აღნიშვნა გრანდიოზული ფეიერვერკით დასრულდება. არც ჯარიკაცებს და არც ტრიბუნაზე მყოფ დელეგაციების წევრებს პირბადეები არ ჰკეთებიათ. ამ დღეს დე ფაქტო ჯანდაცვის სამინისტროს ყველა რეკომენდაცია დაირღვა.
ოკუპირებულ ცხინვალში სადღესასწაულო დღეებთან დაკავშირებით 19-22 სექტემბარმდე არასამუშაო დღეებად გამოცხადდა.
1990 წლის 20 სექტემბერს სამხრეთ ოსეთის სახალხო დეპუტატთა საოლქო საბჭომ მიიღო გადაწყვეტილება სამხრეთ ოსეთის ავტონომიური ოლქის — სამხრეთ ოსეთის საბჭოთა დემოკრატიულ რესპუბლიკად გარდაქმნის თაობაზე, ასევე სსრკ-ს უმაღლეს საბჭოში გაგზავნა მიმართვა, რათა ახალი სოციალისტური რესპუბლიკა გამხდარიყო საბჭოთა კავშირის მეკავშირე ქვეყანა.
სესიაზე მიღებულ იქნა სამხრეთ ოსეთის დემოკრატიული რესპუბლიკის სახელმწიფო სუვერინტეტის დეკლარაცია, ხოლო რესპუბლიკის ტერიტორიაზე გამოცხადდა სსრკ-ს კანონები მოქმედ კანონმდებლობად.
1990 წლის 21 სექტემბერს კი საქართველოს სსრ უზენაესი საბჭოს პრეზიდიუმმა განიხილა რა საკითხი სამხრეთ ოსეთის ავტონომიური ოლქის სახალხო დეპუტატთა საბჭოს მიერ სამხრეთ ოსეთის სუვერინეტისა და სტატუსის შესახებ გადაწყვეტილების თაობაზე, საქართველოს უზენაესი საბჭოს პრეზიდიუმმა ჩათვალა, რომ ზემოაღნიშნული გადაწყვეტილება საქართველოს სსრ ეროვნულ-სახელმწიფოებრივი და ადმინისტრაციულ-ტერიტორიული მოწყობის შეცვლის, რესპუბლიკის სუვერინტეტის ხელყოფის, ავტონომიური ფორმირებების უფლებათა მექანიკური გათანაბრების სამართლებრივი თვალსაზრისით უსაფუძვლო ცდაა და საქართველოს, აგრეთვე, სსრ კავშირის კონსტიტუციების, სახალხო დეპუტატთა საოლქო საბჭოს შესახებ კანონის დარღვევას წარმოადგენდა. ამასთან, საოლქო საბჭოს სესია არადეპუტატების ზეგავლენით, კონსტიტუციური და საპროცედურო ნორმების უხეში დარღვევით ჩატარდა.
საქართველოს უზენაესი საბჭოს პრეზიდიუმმა მიიჩნია, რომ რესპუბლიკისა და ქვეყნის ძირითადი კანონის — კონსტიტუციის საფუძვლებთან დაკავშირებული ამდაგვარი გადაწყვეტილების მიღება არა მარტო უსაფუძვლო და არამართლზომიერი იყო, არამედ ეწინააღმდეგებოდა საქართველოში მცხოვრები ყველა ხალხის, მათ შორის თვით ოსი ხალხის, ინტერესებს და ხელს უწყობს ეროვნებათშორისი ურთიერთობის გამწვავებას.
საქართველოს სსრ უზენაესი საბჭოს პრეზიდიუმმა დაადგინა: სამხრეთ ოსეთის ავტონომიური ოლქის სახალხო დეპუტატთა საბჭოს 1990 წლის 20 სექტემბრის გადაწყვეტილება „სამხრეთ ოსეთის სუვერინეტისა და სტატუსის შესახებ“ გამოცხადდეს ბათილად და იურიდიული ძალის არმქონედ.