"ქართული ოცნებისთვის" სისხლიანი ბანერები გამოხატვის თავისუფლების რეალიზაციაა
"ყველას აქვს ამ ქვეყანაში გამოხატვის თავისუფლება. ვიღაცას შეიძლება მოწონდეს ესა თუ ის გამოხატვის ფორმა, ვიღაცას შეიძლება არ მოწონდეს. ეს არის, როგორც ჩანს, მადლიერი ხალხის საჩუქარი იმ ოპოზიციას, რომელიც 9 წლის მანძილზე გამოირჩეოდა უსასტიკესი მეთოდებით. რა თქმა უნდა, ნებისმიერი გამოხატვის ფორმა, რომელიც შეიცავს ასეთ ნიშნებს, ბუნებრივია, ხელს უწყობს პოლარიზაციას, მაგრამ მთავარი პოლარიზატორები კარგად იცით, ვინ არიან. ესაა რადიკალური ოპოზიცია თავისი 3 კუთვნილი ტელევიზიით", - ასე გამოეხმაურა "ქართული ოცნების" თავმჯდომარე, პარლამენტარი ირაკლი კობახიძე თბილისსა და რეგიონებში 17 სექტემბერს გამოკრულ ბანერებს, რომელზეც ოპოზიციის წევრები სისხლით არიან მოსვრილი. ამგვარი ბანერები სხვა არჩევნების წინა პერიოდშიც გამოჩენილა, ამჯერად სიახლე მასზე გამოსახული გიორგი გახარიაა, რომელიც მმართველი პარტიის გუნდის წევრი იყო, ახლა კი მას მოქმედი პრემიერ-მინისტრი "სააკაშვილის პარტნიორად" მიიჩნევს.
გამოხატვის თავისუფლების უფლების რეალიზაციად მიიჩნევს სისხლიან ბანერებს თბილისის მერი, კახა კალაძეც. ის ამბობს, რომ პირადად მისთვის სიძულვილის ენა მიუღებელია და ამიტომ არ იყენებს ამომრჩეველთან კომუნიკაციისას, თუმცა სიძულვილი, ცილისწამება და შეურაცხყოფა არაერთი პოლიტიკური ძალის იარაღია არჩევნებში მონაწილეობისას და ის, როგორც ქალაქის მერი, არ აპირებს ჩამოხსნას ბანერები, რომელიც პოლარიზაციას უწყობს ხელს.
"რეაგირება არაფერი არ იქნება, ყველას აქვს გამოხატვის უფლება კანონის ფარგლებში. არის კომპანია "ალმა", რომლის საკუთრებაა ეს ბანერები და ისინი იღებენ გადაწყვეტილებებს", - ამბობს კახა კალაძე.
ჟურნალისტების კითხვაზე, იმუშავებს თუ არა წინასაარჩევნოდ ამ ტიპის ბანერები, კალაძემ მედიას ჰკითხა, მოსწონთ თუ არა მათ ის, რაც გამოკრულია. ჟურნალისტების მხრიდან უარყოფითი პასუხის მიღების შემდეგ კი მედია დაადანაშაულა სიძულვილის გაღვივებასა და ორმაგი სტანდარტით მოქმედებაში.
"ისევე არ მომწონს მე ის კამპანია, რომელსაც თქვენი ტელევიზიების საშუალებით თქვენივე პარტია ახორციელებს. შეგიძლიათ ჩართოთ ტელევიზორი და ნახავთ, საარჩევნო კლიპები რაცაა: შეურაცხყოფა, ცილისწამება, ბოროტება, სიძულვილის ენა, აი, ეს ხართ თქვენ და ძალიან სამწუხაროა. მაშინ რატომ არ იღებთ ენას? რატო არ საუბრობთ ამაზე?
ქართული ოცნება და კახა კალაძე მოწოდების სიმაღლეზეა, ვერ ნახავთ ვერცერთ განცხადებას, ან ოპონენტის წინააღმდეგ, ან სიძულვილის ენა გამომეყენებინოს საარჩევნო კამპანიის დროს. ჩემი ოჯახის წინააღმდეგ მიდის ეს ცილისწამების ვიდეოები, ჩემი შვილები, რა, რეზინის შვილები მყავს? ეს არის რეალობა და ორმაგი სტანდარტი" - თქვა კახა კალაძემ.
სისხლიან ბანერებზე, რომელიც თბილისში 17 სექტემბერს გამოჩნდა, გამოსახულია ენმ-ს თავმჯდომარე ნიკა მელია, დეპუტატი გუბაზ სანიკიძე, ტვ პირველის საინფორმაციო სამსახურის უფროსი ნოდარ მელაძე, მთავარი არხის დირექტორი ნიკა გვარამია, ევროპული საქართველოს ლიდერი გიგა ბოკერია, გირჩი - მეტი თავისუფლების ლიდერი ზურაბ ჯაფარიძე და ყოფილი პრემიერ-მინისტრი, პარტიის "საქართველოსთვის" დამფუძნებელი, გიორგი გახარია.