ბაქრაძის თქმით, მათ 20 ხმას გადამწყვეტი მნიშვნელობა ჰქონდა
„ამავე დროს, ჩვენი პოზიცია არის სრულიად მკაფიო. ჩვენ დღეს გადავარჩინეთ პროპორციული სისტემა, მაგრამ არ დავუჭერთ მხარს მეორე და მესამე მოსმენით ამ კანონპროექტს, თუ ხელისუფლება არ შეასრულებს საკუთარ ვალდებულებას, არ გაათავისუფლებს გიორგი რურუას და ამით არ შეასრულებს 8 მარტის შეთანხმებას”.
21 ივნისს, 136 ხმით ხუთის წინააღმდეგ, საქართველოს პარლამენტმა პირველი მოსმენით მხარი დაუჭირა საკონსტიტუციო ცვლილებებს, რომლის თანახმადაც, იცვლება არჩევნებში მანდატების გადანაწილების წესი. ცვლილებების კანონად ქცევისთვის სამი მოსმენაა საჭირო და თითოზე მინიმუმ 113 ხმა.
ამ ცვლილებების მიხედვით, 77-დან 120-მდე იცვლება პროპორციულად არჩეული დეპუტატების რიცხვი, ხოლო 73-დან 30-მდე მცირდება მაჟორიტარული ოლქების რაოდენობა.
20 ივნისს ცნობილი გახდა, რომ საკონსტიტუციო ცვლილებების პირველი მოსმენით კენჭისყრაში მონაწილეობას მიიღებდნენ „ევროპული საქართველოს“ წევრები, თუმცა, უარს აცხადებდნენ პროცესში ჩართვაზე მეორე მოსმენისას, თუკი არ გათავისუფლდება „მთავარი არხის“ მეწილე, გიორგი რურუა, რომელიც გასული წლის 18 ნოემბერს, ცეცხლსასროლი იარაღის მართლსაწინააღმდეგო შენახვა-ტარების ბრალდებითაა დაკავებული.
კანონპროექტს მხარი დაუჭირეს "ქართული ოცნების", "ევროპული საქართველოს", "პატრიოტთა ალიანსის", "სოციალ-დემოკრატების", "კონსერვატიული პარტიის" წევრები. კანონპროექტის მომხრეების რიცხვში იყო დამოუკიდებელი დეპუტატების ერთი ნაწილიც.
კენჭისყრაში მონაწილეობა არ მიუღიათ "ნაციონალური მოძრაობის" წარმომადგენლებს. მათი განცხადებით, სანამ სრულფასოვნად არ შესრულდება 8 მარტის შეთანხმება და მმართველი გუნდი არ გაათავისუფლებს პოლიტიკურ პატიმრებს, ისინი კენჭისყრაში მონაწილეობას არ მიიღებენ.