უგულავას თქმით, მაჟორიტარებზე შეთანხმება „ლელოს“ გარეშე გამოვა, ენმ-ის გარეშე აზრს კარგავს

„ევროპული საქართველოს“ გენერალურმა მდივანმა გიგი უგულავამ „მთავარი არხის’ ეთერში ილაპარაკა საპარლამენტო არჩევნებზე საერთო ოპოზიციური მაჟორიტარი კანდიდატების წარდგენის საჭიროების შესახებ.

როგორც უგულავა განმარტავს, ივანიშვილის ფავორიტმა მაჟორიტარმა რამდენიც არ უნდა აიღოს რომელიმე ოლქში, ის მიიღებს 50%-ზე ნაკლებს. შესაბამისად, თბილისის ყოფილი მერის თქმით, „ოპოზიციას თუ ეყოლება ერთიანი კანდიდატი, მაღალია შანსი იმისა, რომ პირველი ტურის შემდეგ ოპოზიციას 5-8 მაჟორიტარი ჰყავდეს გამარჯვებული, იმისთვის, რომ მეორე ტურში არ განმეორდეს ის, რაც 2016 წლის საპარლამენტო არჩევნებსა და 2018 წლის საპრეზიდენტო არჩევნებზე მოხდა“.

პოლიტიკოსი ასახელებს იმ პარტიებს, რომლებსაც საერთო მაჟორიტარის წარდგენის პროცესში აქვთ საკვანძო დატვირთვა. „ვერც იმ ნარატივს მივიღებ, რომ „მოდი, „ლელო“, რადგან გავიდა, მეც გავალ“. იმიტომ, რომ სხვადასხვა ფიგურებს სხვადასხვა წონა აქვთ. ერთიანი მაჟორიტარის შეთანხმება „ლელოს“ გარეშე გამოვა, „ლეიბორისტების“ გარეშეც ძნელად გამოვა, „ევროპული საქართველოს“ გარეშე პრაქტიკულად არ გამოვა და „ნაციონალების“ გარეშე საერთოდ აზრს კარგავს. ამავე დროს „ნაციონალურ მოძრაობას“ უნდა ესმოდეს რომ მეორე ტური ვერ გადაიქცევა და არ გადაიქცევა „5 ვერსუს 41“, ეს საზოგადოების დაკვეთა არ არის. ეს გზა გავიარეთ და ვნახეთ, რომ ასეთ დიხოტომიაში ივანიშვილი და „ქართული ოცნება“ იგებენ. ერთადერთი, რასაც ისინი ვერ უგებენ, არის აქეთ მხარეს პარტიული მრავალფეროვნება და მაქსიმალურად შეჯერებული ერთიანი კანდიდატი. ეს არის გამარჯვების ფორმულა“, - თქვა უგულავამ.

„ევროპული საქართველოს“ ერთ-ერთი ლიდერის აზრით, აუცილებელია შეთანხმება პირველი ტურისთვის იყოს მიღწეული.  „ამ ეტაპზე პრინციპულაად მიუღებელია მეორე ტურზე შეთანხმების საკითხის შემოტანა. პირველ ტურში თუ მაჟორიტარებზე ერთობა ვერ შედგება, ეს ნიშნავს, რომ პირველ ტურში ოპოზიციას არცერთი გამარჯვებული მაჟორიტარი არ ეყოლება. ეს არის უბრალოდ ხარაკირი და ჩვენი ამომრჩევლის ღალატი. შევიდეთ ისეთ ბრძოლაში, რომელშიც აპრიორი დამარცხებული ვართ“.   

გიგი უგულავას თქმით, საზოგადოებას აინტერესებს დაპირების შესრულება, რომელიც გულისხმობს მაჟორიტარ კანდიდატებზე კოორდინაციას - მათი ისე შერჩევა, რომ ერთმანეთს არ გაუყონ ხმები.

„მოდი ასე ვთქვათ, გავხსნათ ფრჩხილები, ივანიშვილიც შეცდება (და გარკვეულწილად ეს ობიექტური რეალობის აღქმაც არის), რომ მთავარი ფრონტი წარმოაჩინოს: აქეთ „ოცნება“, იქით „ნაციონალური მოძრაობა“. ამას შეეცდებიან, ეს საერთო დიდი მოზაიკის მნიშვნელოვანი სურათის ნაწილი იქნება. ეს დაპირისპირება ვერ გაქრება. მე იმაშიც არ შევდივარ, ეს ხელოვნურია თუ არა. ეს არის მოცემულობა. უნდა გვესმოდეს, რომ ვითარება თუ დავიდა ამ მოცემულობამდე, ოპოზიცია არის განწირული. მარტივად ვამბობ, ვისაც მოეწონება ან არ მოეწონება. ოპოზიცია არ არის „5 ნომერი“, მაგრამ „5 ნომერი“ არის ოპოზციის მნიშვნელოვანი ნაწილი. ოღონდ მნიშვნელოვანი ნაწილი არ ნიშნავს იმას, რომ მე ვარ და ჩემი ნაბადი და წავედი ახლა მეორე ტურში... ცა და დედამიწა არის განსხვავება: მეორე ტურში 41-ის წინააღმდეგ უნდა იყოს 5-იც, 2-იც, 27-იც და 29-ც“, - თქვა მან.

უგულავა მიიჩნევს, რომ მაჟორიტარების გარდა, უმნიშვნელოვანესია, რომ ოპოზიციამ არჩევნების შედეგები აღიქვას, როგორც პროპორციული ნაწილის შეჯამებაც. „ოპოზიციის მთავარი ნაწილი, როდესაც მაჟორიტარებზე ვსაუბრობთ, ერთიან მაჟორიტარებზე, მთავარი ის მაჟორიტარი კი არ არის, არამედ ის პარტიები პარალელურად ვამბობთ, რომ ჩვენ 28 ოქტომბერს, საღამოს ვდგებით ერთად. პროპორციული ნაწილი ჯამდება ივანიშვილის წინააღმდეგ. თუ ჩვენ ცალ-ცალკე ვართ, ეს ვერ და არ მოხდება“, - თქვა უგულავამ.

„ლელო“-ს გენერალური მდივნის ბადრი ჯაფარიძის განცხადებით, პარტიას  ყველა მაჟორიტარულ ოლქში ძლიერი კანდიდატი ეყოლება. მეორე ტურში გადასვლის შემთხვევაში „ლელო“ მზად არის კონსოლადიციისთვის, რომ ოპოზიციურმა კანდიდატმა გაიმარჯვოს.