ერდოანი დაიმუქრა, რომ ევროპისკენ გაატარებს სირიელ ლტოლვილებს
არანაკლებ 18 ათასამდე ლტოლვილმა მოიყარა თავი თურქეთსა და ევროკავშირს შორის საზღვარზე სირიის პროვინცია იდლიბში ვითარების გამწვავების გამო. ამის შესახებ თურქეთის პრეზიდენტმა რეჯეპ ტაიპ ერდოანმა განაცხადა.
პარასკევს ღამით საბერძნეთის პოლიციამ სირიელი ლტოლვილების წინააღმდეგ ცრემლმდენი გაზი გამოიყენა თურქეთის საზღვარზე, იტყობინება როიტერსი. თვითმხილველთა თქმით, ლტოლვილები პოლიციას ქვებს ესროდნენ და საბერძნეთის ტერიტორიაზე გადასვლას ცდილობდნენ.
თურქეთის პრეზიდენტის თქმით, ანკარა მზადაა, ქვეყნის სამხრეთში უსაფრთხო ზონა შექმნას მილიონი ლტოლვილისთვის. ამასთან, ერდოანი დაიმუქრა, რომ ლტოლვილებს გერმანიაში გაგზავნის, თუკი ბერლინი არ შეასრულებს დაპირებას მიგრანტთა ბანაკების დაფინანსების თაობაზე.
უკანასკნელ დღეებში იდლიბში გამწვავდა დაპირისპირება სირიის ოპოზიციასა და პრეზიდენტ ბაშარ ალ-ასადის ჯარებს შორის. ათასობით სამოქალაქო პირმა დატოვა სახლები და თურქეთისკენ გაეშურა. თურქეთის ხელისუფლებამ განაცხადა, რომ ვერ შეძლებს ლტოლვილთა ტალღის შეკავებას, თუკი ისინი ევროპისკენ სვლას გააგრძელებენ. ამ განცხადებების შემდეგ უნგრეთის პრემიერ-მინისტრმა ვიქტორ ორბანმა განაცხადა ქვეყნის სამხრეთ საზღვრების დაცვის გაძლიერების შესახებ.