მოსკოვში მიმდინარეობს ბორის ნემცოვის ხსოვნის მარში
მოსკოვში დაიწყო ოპოზიციონერი პოლიტიკოსის, ბორის ნემცოვის ხსოვნის მარში.
ბორის ნემცოვი მოკლეს 2015 წლის 27 თებერვალს, მოსკოვში, კრემლის მახლობლად, მოსკვორეცკის ხიდზე. გამოძიებას დღემდე არ დაუდგენია მკვლელობის შემკვეთის ვინაობა.
ბორის ნემცოვის ხსოვნის მარში ყოველ წელს იმართება მოსკოვსა და რუსეთის სხვა ქალაქებში.
როგორც ბორის ნემცოვის ყოფილმა ადვოკატმა და მოკლული პოლიტიკოსის ქალიშვილის წარმომადგენელმა, ვადიმ პროხოროვმა სააგენტო ТАСС-ს უთხრა, მკვლელობის სავარაუდო ორგანიზატორის, რუსლან მახუდინოვის დაკავება შესაძლებელი იყო ქალაქ ახალ ურენგოიში. პროხოროვის მონაცემებით, დამნაშავეს შეეძლო სტუმრებოდა ამ ქალაქს ყალბი საბუთებით.
სააგენტოს მოჰყავს ადვოკატის სიტყვები, რომელთა მიხედვითაც, ნემცოვის მკვლელობის გამოძიების ვადა გაგრძელდა 2020 წლის მაისამდე, თუმცა, ამის მიუხედავად, არანაირი საგამოძიებო მოქმედებები არ ხორციელდება.
2017 წლის ივნისში სასამართლომ ყოფილ ჩეჩენ სამხედრო მეთაურს, ზაურ დადაევს 20 წლით პატიმრობა მიუსაჯა ნემცოვის მკვლელობის ბრალდებით. კიდევ ოთხი ჩეჩენი ცნეს მკვლელობასთან კავშირში დამნაშავედ და მათ 11-დან 19 წლამდე პატიმრობა მიესაჯათ. კრიტიკოსები, მათ შორის ნემცოვის კოლეგები და ახლობლები, ამბობენ, რომ რუსეთის ხელისუფლებამ ვერ დაადგინა, ვინ იყო მკვლელობის დამკვეთი. გამოითქვა ეჭვი, რომ მკვლელობა დაუკვეთეს რუსეთის პრეზიდენტ ვლადიმირ პუტინის ან ჩეჩნეთის ლიდერ რამზან კადიროვის უახლოესი წრიდან.
ბორის ნემცოვის ხსოვნის პირველი მარში გაიმართა 2015 წელს, მკვლელობიდან მეორე დღეს და მასში მონაწილეობა მიიღო 50 ათას ადამიანზე მეტმა. შარშან, მოსკოვში ნემცოვის ხსოვნის მარშზე დაახლოებით 8 ათასი ადამიანი გამოვიდა.