პომპეო: აშშ-სა და თალიბანს შორის სამშვიდობო შეთანხმების ხელმოწერას 29 თებერვლისთვის მოელიან
აშშ-ის სახელმწიფო მდივანის, მაიკ პომპეოს განცხადებით, მოელიან, რომ სამშვიდობო შეთანხმებას აშშ-სა და ავღანეთის თალიბანს შორის ხელს მოაწერენ 29 თებერვალს იმ პირობით, რომ „ძალადობის შემცირება“, რომელიც ძალაში შევა შუაღამისას, არ აღმოჩნდება ნაჩქარევი.
21 თებერვალს უფრო ადრე, ავღანეთის მაღალი რანგის ოფიციალურმა პირმა და თალიბანმა განაცხადეს, რომ ადგილობრივი დროით, შუაღამიდან ამოქმედდება ერთკვირიანი „ძალადობის შემცირება“.
აშშ-ის და თალიბანის წარმომადგენლებს შორის 2018 წლის შემდეგ გრძელდება მოლაპარაკება, რომლის მიზანია დასრულდეს 18-წლიანი ომი ავღანეთში.
აშშ და თალიბანი ჩართული იყვნენ მოლაპარაკებაში, რათა მიეღწიათ ავღანეთის კონფლიქტის პოლიტიკური გზით დასრულებისა და რეგიონში აშშ-ის ყოფნის შემცირებისთვის.
გასულ კვირებში, „ეროვნული ერთიანობის მთავრობასთან კონსულტაციების შემდეგ აშშ-ის წარმომადგენლები მოლაპარაკებებში, დოჰაში, თალიბანთან მივიდნენ ურთიერთგაგებამდე, რომ მთელ ქვეყანაში შემცირდეს ძალადობა“, განაცხადა პომპეომ, რომელმაც დასძინა, რომ შიდაავღანური მოლაპარაკება დაიწყება ამ შეთანხმების გაფორმების შემდეგ, საბოლოო მიზანია „განვავითაროთ მრავალმხრივი და მტკიცე ზავი და შევქმნათ ავღანეთის პოლიტიკური გზამკვლევი“.
წერილობით განცხადებაში თალიბანმა დაადასტურა, რომ დაიგეგმა შეთანხმებაზე ხელმოწერა 29 თებერვლისთვის საერთაშორისო მეთვალყურეების თანდასწრებით. თალიბანს არ სურდა ავღანეთის მთავრობასთან მოლაპარაკება, რადგან მას დასავლეთის მარიონეტად მიიჩნევს. ახლა თალიბანმა განაცხადა, რომ მზადდება შიდაავღანური მოლაპარაკება, მაგრამ არ დაუზუსტებიათ, როდის მოხდება ეს.
ავღანეთის სახელმწიფო უშიშროების საბჭოს წარმომადგენელმა, ჯავად ფაიზალმა განაცხადა, რომ ავღანეთის მთავრობის ჯარები გააგრძელებენ ბრძოლას ექსტრემისტული გაერთიანება „ისლამური სახელმწიფოს“ წინააღმდეგ „ძალადობის შემცირების“ პერიოდში.
დოჰაში თალიბანის ერთმა ლიდერმა როიტერსს უთხრა, რომ „ძალადობის შემცირება“ არ ნიშნავს ზავს. მისი თქმით, თავდაცვის უფლება ყველას აქვს, მაგრამ ერთმანეთის ძალებს შვიდი დღის განმავლობაში თავს არ დაესხმებიან.