აშშ-ის არმია ადასტურებს, რომ ავღანეთში მისი თვითმფრინავი ჩამოვარდა
აშშ-ის არმია და ავღანეთში ნატოს ხელმძღვანელობით მოქმედი ძალები აცხადებენ, რომ 27 იანვარს აღმოსავლეთ ავღანეთში აშშ-ის თვითმფრინავი ჩამოვარდა. მათი თქმით, ჯერჯერობით არ არის იმის ნიშნები, რომ თვითმფრინავი მტრის მიერ გახსნილმა ცეცხლმა ჩამოაგდო.
ავღანეთში აშშ-ის ძალების პრესმდივნის, პოლკოვნიკ სონი ლეგეტის თქმით, სამხედრო თვითმფრინავი, ბომბდამშენი E-11A, ჩამოვარდა ღაზნის პროვინციაში და მიმდინარეობს კატასტროფის მიზეზების გამოძიება.
"ავარიის მიზეზების გამოძიება მიმდინარეობს, თუმცა არ იკვეთება ინდიკატორები, რომ ავარია მტრის მიერ გახსნილმა ცეცხლმა გამოიწვია" - თქვა ლეგეტმა. მას არ უსაუბრია მსხვერპლის, ან ავარიის დეტალების შესახებ.
პარალელურად, თვითმფრინავის ჩამოვარდნა რადიო თავისუფლებას იმეილით დაუდასტურა ნატოს ხელმძღვანელობით მოქმედმა ძალებმა. ამ წერილშიც ეწერა, რომ არ იკვეთება ავარიის მტრული ცეცხლით გამოწვევის ინდიკატორები. "დამატებით ინფორმაციას მოგაწვდით. თალიბანის განცხადებები კიდევ ერთი თვითმფრინავის ჩამოვარდნაზე სიცრუეა" - ვკითხულობთ წერილში.
უფრო ადრე თალიბანის პრესმდივანმა, ზაბიჰულა მუჯაჰიდმა განაცხადა, რომ აღმოსავლეთ ავღანეთში, ღაზნის პროვინციაში აშშ-ის სამხედრო თვითმფრინავი ჩამოვარდა და ამას ემსხვერპლა აშშ-ის არმიის "ბევრი" წევრი. ეს ექსტრემისტული ჯგუფი ხშირად აზვიადებს ხოლმე მსხვერპლის რაოდენობას. ღაზნის პროვინცია ჰინდუ კუშის მთების ქვეშ მდებარეობს.