კაპანაძე კონგრესმენის წერილზე: ეს უნდა იყოს კარგი გამოსაფხიზლებელი ზარი ხელისუფლებისთვის
„ევროპული საქართველოს“ ერთ-ერთი ლიდერის, სერგი კაპანაძის შეფასებით, კონგრესმენ მარკვეინ მალინის ღია წერილი, რომლითაც მან საქართველოს პრემიერ-მინისტრს, გიორგი გახარიას მიმართა, არის ნათელი დადასტურება იმისა, რომ აშშ-ში შეშფოთებულები არიან საქართველოში მიმდინარე პროცესებით:
„ეს წერილები არ წყდება, ეს განცხადებები არ წყდება და ისინი მოდის არა მარტო ჩვენი ევროპელი პარტნიორებისგან, არამედ ამერიკელი პარტნიორებისგანაც. ეს უნდა იყოს კარგი გამოსაფხიზლებელი ზარი ხელისუფლებისთვის, მას რომ ოდნავ საღი აზრი მაინც ჰქონდეს შერჩენილი“, - აღნიშნა ჟურნალისტებთან კომენტარში სერგი კაპანაძემ. მისი თქმით, „ნათელია უკვე ყველასთვის, რომ ქვეყანაში მიმდინარეობს პოლიტიკური ოპონენტების დევნა, არის სერიოზული დარტყმა დემოკრატიულ პროცესებზე, არის ეკონომიკური კრიზისი, არის უგულებელყოფა დემოკრატიული ინსტიტუტების“.
ამერიკის შეერთებული შტატების კონგრესმენმა, რესპუბლიკური პარტიის წევრმა მარკვეინ მალინმა სოციალურ ქსელში წერილით მიმართა საქართველოს პრემიერ-მინისტრს, გიორგი გახარიას. ღია წერილში კონგრესმენი გამოხატავს შეშფოთებას საქართველოს დემოკრატიული ღირებულებებიდან „განგრძობადი გადახვევის“ გამო. წერილში საუბარია ასევე ქვეყანაში „პირდაპირი უცხოური ინვესტიციებისთვის არსებულ გაუარესებულ ეკონომიკურ კლიმატზე“.