აშშ და თალიბანი აგრძელებენ მოლაპარაკებას ხელშეკრულების გარშემო
თალიბანის წარმომადგენლის განცხადებით, დაჯგუფებასა და აშშ-ის მოლაპარაკების გუნდს შორის ყატარში ორი დღის განმავლობაში იმართებოდა მოლაპარაკება. დელეგაციებს პროდუქტიული მოლაპარაკება ჰქონდათ გუშინ და დღეს, დაწერა ტვიტერით თალიბანის წარმომადგენელმა, სუჰაილ შაჰიდმა და დასძინა, რომ მოლაპარაკება რამდენიმე დღე გაგრძელდება და მხარეები სისტემატურად გაუცვლიან ერთმანეთს ინფორმაციას სხვადასხვა ინტერვალით.
შაჰიდის თქმით, მოლაპარაკება იყო „სასარგებლო“ და მხარეები ერთობლივი შეთანხმების და შესაბამისი ცერემონიის გარშემო მსჯელობენ. თალიბანის წარმომადგენელს დეტალები არ გაუმხელია.
აშშ-ის ოფიციალურ პირებს კომენტარი არ გაუვრცელებიათ. როიტერსს მოჰყავს ორი უცნობი წყაროს ნათქვამი, რომ თალიბანი დათანხმდა აშშ-ის ჯარებთან 10-დღიან ცეცხლის შეწყვეტას, ავღანეთის არმიასთან დაპირისპირების შემცირებასა და თათბირს ავღანეთის მთავრობის ოფიციალურ პირებთან, თუ შეთანხმებას მიაღწევს აშშ-თან დოჰაში. მიმომხილველები თვლიან, რომ თუ შეთანხმება მიღწეულ იქნა, შეიძლება გაჩნდეს ავღანეთის კონფლიქტის ხანგრძლივად მოგვარების იმედი.