მიხეილ სააკაშვილი ივანიშვილზე: რა მაგარი ქვეყანა დავუტოვეთ და რას დაამსგავსა

საქართველოს ყოფილი პრეზიდენტი, მიხეილ სააკაშვილი „ქართული ოცნების“ თავმჯდომარის, ბიძინა ივანიშვილის ინტერვიუს ვიდეომიმართვით ეხმაურება და ამბობს, რომ  „თავს ძალა დაატანა და ივანიშვილის ბოლო, სრულიად არეულ ინტერვიუს უყურა“.

სააკაშვილი ფიქრობს, რომ ივანიშვილის საქმე წასულია და ის წარსულს ბარდება.  მისი სიტყვებით, იმ ფონზე, როცა მოლდოვიდან გაიქცა ოლიგარქი, როცა უკრაინაში დამარცხდა პოროშენკო, ოლიგარქმა წააგო სომხეთი, მხოლოდ საქართველო დარჩა ფეოდალური მმართველობის ბოლო კუნძულად: „ეს ქართველ ხალხს არ ეკადრება“, - ამბობს სააკაშვილი.

საქართველოს ყოფილი პრეზიდენტი ასევე ამბობს, რომ ივანიშვილი ბოლომდე გადაეფარა შს მინისტრს, გიორგი გახარიას და პრაქტიკულად აღიარა, რომ დარბევის ბრძანება თავად გასცა:

„ის ბოლომდე ამართლებს რუსების ჩამოყვანას და პუტინისადმი გაწოლის პოლიტიკას. ის შლის ქართულ სახელმწიფოს. რა მაგარი ქვეყანა დავუტოვეთ და რას დაამსგავსა. მთავარ ხელისშემშლელად „ნაციონალურ მოძრაობას“ ასახელებს და ეს ძალიან ნიშანდობლივია, იმიტომ, რომ „ნაციონალური მოძრაობა“ გამოკითხვებში სერიოზულად ლიდერობს“, - აცხადებს სააკაშვილი.

მიხეილ სააკაშვილი თავის მომხრეებს მიმართავს და ამბობს, რომ დღეს ივანიშვილი დამფრთხალია და მზად არის ბევრად მეტი სისხლი დაღვაროს:

„ეს ჩვენ არ უნდა დავუშვათ, ჩვენ არ უნდა შეგვეშინდეს მათი, მაგრამ როცა ის გვპირდება, რომ სექტემბრიდან დაიწყებს რაღაც დალაგებას, გავიხსენოთ, რომ 2016 წელსაც ასე იძახდა, შარშან, საპრეზიდენტო არჩევნების მეორე ტურის წინაც ასე იძახდა. ყოველ ჯერზე სულ ახალი უბედურებები ხდებოდა“.

სააკაშვილის სიტყვებით, საქართველოს აღარ აქვს დასაკარგი დრო და დღეს გამოსავალი რიგგარეშე არჩევნები და ეროვნული ერთიანობის მთავრობის ჩამოყალიბებაა.