პროკურატურა: ბრიტანეთისთვის ჯეკ შეფერდის გადაცემა სტანდარტული პროცედურით წარიმართება
საქართველოს პროკურატურა აცხადებს, რომ დიდი ბრიტანეთის მოქალაქის ჯეკ შეფერდის საქმეზე 29 იანვარს გამართული სასამართლო სხდომა კანონით დადგენილი პროცედურის ნაწილი იყო. პროკურატურის განმარტებით, მოქმედი კანონმდებლობის თანახმად, ექსტრადიციას დაქვემდებარებულ პირს უფლება აქვს მის მომთხოვნ სახელმწიფოში გადაცემა გამარტივებული პროცედურის გამოყენებით განხორციელდეს, ხოლო თუ ამ უფლებით სარგებლობა არ სურს, თანხმობა უნდა გამოხატოს სასამართლოს წინაშე.
„ამასთან, გამარტივებული პროცედურების გამოყენებით მომთხოვნ სახელმწიფოში გადაცემის თაობაზე ექსტრადიციას დაქვემდებარებული პირის პოზიციის დასადგენად პროკურორი ვალდებულია სასამართლოს მიმართოს შესაბამისი შუამდგომლობით. აღსანიშნავია, რომ შუამდგომლობით ბრალდების მხარე ითხოვს არა პირის ექსტრადიციის დასაშვებად ცნობას, არამედ მხოლოდ შუამდგომლობს სასამართლოს წინაშე, რათა ექსტრადიციას დაქვემდებარებულმა პირმა გამოხატოს საკუთარი პოზიცია - ეთანხმება თუ არა გამარტივებული პროცედურის გამოყენებით ექსტრადიციას“ - ნათქვამია პროკურატურის ოფიციალურ განცხადებაში. მისივე ცნობით, სწორედ ამ ვალდებულების შესასრულებლად მიმართა პროკურატურამ სასამართლის სხდომის დანიშვნის შუამდგომლობით და მას შემდეგ, რაც ჯეკ შეფერდმა გამარტივებული პროცედურით ექსტრადიციაზე უარი განაცხადა, მომავალში, ბრიტანული მხარისათვის მისი გადაცემა სტანდარტული პროცედურით წარიმართება. კერძოდ, პროკურატურის განმარტებით, მოქმედი კანონმდებლობის თანახმად, საექსტრადიციო მასალების 40 დღის ვადაში მიღებისა და შესწავლის შემდეგ საქართველოს გენერალური პროკურატურა ძებნილი პირის მის მომთხოვნ სახელმწიფოში ექსტრადიციის დასაშვებობის საკითხის გადასაწყვეტად გონივრულ ვადაში მიმართავს შუამდგომლობით შესაბამის რაიონულ (საქალაქო) სასამართლოს, რომლის გადაწყვეტილებაც შესაძლებელია ერთჯერადად გასაჩივრდეს საქართველოს უზენაესი სასამართლოს სისხლის სამართლის საქმეთა პალატაში კერძო საკასაციო საჩივრის შეტანით. დასაშვებობის საკითხზე სასამართლოს გადაწყვეტილება ეცნობება საქართველოს იუსტიციის მინისტრს, რომელიც მიიღებს საბოლოო გადაწყვეტილებას შესაბამის უცხო სახელმწიფოში პირის ექსტრადიციის თაობაზე.
დიდი ბრიტანეთის მოქალაქე ჯეკ შეფერდი თბილისში, პოლიციას 23 იანვარს ჩაბარდა, რის შემდეგაც დააკავეს და სასამართლოს მიერ შეფარდებული აქვს სექსტრადიციო პატიმრობა. შეფერდს სამშობლოში ბრალად ედება გაუფრთხილებლობით სიცოცხლის მოსპობა. 29 იანვარს, მას შემდეგ, რაც თბილისის საქალაქო სასამართლოში გამართულ სხდომაზე შეფერდმა უარი თქვა გამარტივებული წესით ექსტარდირებაზე, მისმა ადვოკატმა მარიამ კუბლაშვილმა თქვა: „შეფერდმა აირჩია ქართული ციხე, ვიდრე დაბრუნებულიყო გაერთიანებულ სამეფოში, სადაც საფრთხე ემუქრება.“