სოფო ვერძეული: მოსამართლეების სიის პარლამენტში განხილვის მოლოდინი არც გვქონია
ადამიანის უფლებების სწავლებისა და მონიტორინგის ცენტრის წარმომადგენელი სოფო ვერძეული ეხმიანება უზენაესი სასამართლოს მოსამართლეობის კანდიდატების მიმართვას პარლამენტისადმი.
„არც გვქონდა მოლოდინი, რომ ამ სიას არსებული ფორმით პარლამენტი განიხილავდა, იმ შეხვედრის გათვალისწინებით, რაც ბოლოს შედგა პარლამენტის თავმჯდომარესა და საბჭოს მდივანს შორის. შედეგობრივად, ეს ბევრს არაფერს ცვლის. რა თქმა უნდა, ის გარკვეულწილად პროტესტისა და ბოლო დღეების მოვლენების შედეგია, რომელიც დაინახა სასამართლომ. თუმცა, ვფიქრობ ამის უკან დგას მათი სურვილი და მცდელობა, რომ ამ პროცესებში გარკვეული ტაქტიკური თუ სტრატეგიული უპირატესობა მოიპოვონ და თავისი გადაწყვეტილებით აჩვენონ საზოგადოებას რომ აი, გადადგეს ეს ნაბიჯი, რაც მათი მხრიდან იყო მაქსიმუმი“, განუცხადა სოფო ვერძეულმა რადიო თავისუფლებას.
დღეს უზენაესი სასამართლოს მოსამართლეობის კანდიდატები საქართველოს პარლამენტს მიმართეს, რომ არ მიეცეს შემდგომი მსვლელობა მათი კანდიდატურების განხილვას.