ოკუპირებულ აფხაზეთში გამოცხადებულმა კარანტინმა ქართველ სტუდენტებს პრობლემა შეუქმნა
ოკუპირებული აფხაზეთიდან დანარჩენ საქართველოში გადასვლას ვერ ახერხებენ სტუდენტები, რომლებიც ზუგდიდის უნივერსიტეტში სწავლობენ. მათ ე.წ. საზღვარზე არ უშვებენ „ღორის გრიპის“ გამო დე ფაქტო ხელისუფლების მიერ 11 იანვრიდან გამოცხადებული კარანტინის გამო. მდინარე ენგურთან ე.წ. საზღვრის დაკეტვამ გამოცდების ჩაბარების შესაძლებლობა შეუზღუდა 12-მდე გალელ სტუდენტს, რომლებსაც ზუგდიდში საცხოვრებელი არ აქვთ და სწავლის პროცესში მუდმივად უწევთ გალსა და ზუგდიდს შორის მგზავრობა. ზუგდიდის სასწავლო უნივერსიტეტის სტუდენტებმა გამოცდების ჩაბარება ამ კვირიდან დაიწყეს. უნივერსიტეტის რექტორმა თეონა ხუფენიამ რადიო თავისუფლებას უთხრა, რომ ოკუპირებულ აფხაზეთში მცხოვრები სტუდენტებისთვის გამოცდები ცალკე ჩატარდება.