იუსტიციის საბჭოს სხდომასთან ერთად საპროტესტო აქცია ჩატარდება
დღეს გაიმართება საქართველოს იუსტიციის უმაღლესი საბჭოს სხდომა. 11 საათზე დანიშნული სხდომის დასრულების შემდეგ დაიწყება გასაუბრება მოსამართლეობის 7 კანდიდატთან. იუსტიციის უმაღლეს საბჭოში მოსამართლეობის კანდიდატებთან გასაუბრება 2018 წლის შემოდგომიდან მიმდინარეობს.
სხდომის წინ იუსტიციის უმაღლეს საბჭოსთან დაიწყება საპროტესტო აქცია სასამართლო სისტემაში ბოლო ხანს განვითარებული მოვლენების გამო. აქციაში მონაწილეობას მიიღებენ ადვოკატები, არასამთავრობო ორგანიზაციების წარმომადგენლები და სამოქალაქო აქტივისტები, რომლებიც ხელს მოაწერენ მანიფესტს, მართლმსაჯულების გადასარჩენად. აქციის ორგანიზატორთა განცხადებით, „სასამართლო შეუქცევადად კარგავს რეპუტაციას და შანსს, რომ ახლო მომავალში მაინც მოიპოვოს რეალური დამოუკიდებლობა. უვადოდ ინიშნებიან მოსამართლეები, რომელთა მიმართ საზოგადოების ნდობა უკიდურესად დაბალია. მოსამართლეთა გავლენიანი ჯგუფი, ხელისუფლების მხარდაჭერისა და არასწორი პოლიტიკის შედეგად, ახერხებს დაეპატრონოს მართლმსაჯულებას და მოუსპოს მას განვითარების შანსი.”
აქციის ორგანიზაატორები აღნიშნავენ, რომ ხელისუფლებამ და სასამართლო სისტემამ უნდა დაინახოს, რომ საზოგადოება ითხოვს დამოუკიდებელ სასამართლოს.