რუსეთში ტარდება აქციები კურილის კუნძულების იაპონიისათვის სავარაუდო გადაცემის წინააღმდეგ
მოსკოვსა და რუსეთის რამდენიმე ქალაქში კვირას ტარდებდა საპროტესტო აქციები კურილის არქიპელაგის რამდენიმე კუნძულის იაპონიისათვის სავარაუდო გადაცემის წინააღმდეგ.
ხელისუფლებასთან შეთანხმებული მიტინგის ორგანიზატორია რამდენიმე მემარცხენე-ნაციონალისტური გაერთიანება, მათ შორის „მემარცხენე ფრონტი“ და იგორ სტრელკოვის მოძრაობა „ნოვოროსია“.
იუწყებიან, რომ რუსეთის შორეული აღმოსავლეთის ქალაქ ხაბაროვსკში საპროტესტო დემონსტრაციაში მონაწილეობას ღებულობდა 500 კაცი, რომელიც სკანდირებდა „კურილის კუნძულები ჩვენი! ძირს პუტინის ხელისუფლება!“
იაპონია არ აღიარებს რუსეთის კუთვნილებად კურილის არქიპელაგის სამხრეთით მდებარე კუნძულებს - იტურუპს, შიკოტანს, კუნაშირსა და ხაბომაის. ამ კუნძულების გარშემო წარმოშობილი დავის გამო რუსეთსა და იაპონიას აქამდე არ მოუწერათ ხელი სამშვიდობო შეთანხმებისათვის.
14 ნოემბერს, რუსეთისა და იაპონიის ლიდერების შეხვედრის შემდეგ, კრემლის პრესმდივნმა დმიტრი პესკოვმა ისაუბრა გეგმაზე, მხარეები დაუბრუნდნენ 1956 წლის დეკლარაციას, რომლითაც მოსკოვი თანხმდებოდა იაპონიისათვის გადაეცა ოთხიდან ორი კუნძული.
მაგრამ ამის შემდეგ რუსეთის საგარეო საქმეთა სამინისტრომ განაცხადა, რომ სამშვიდობო შეთანხმების ხელმოწერის პირობას წარმოადგენს რუსეთის სუვერენიტეტის აღიარება კურილის ყველა კუნძულზე.
მოელიან, რომ მოლაპარაკების გასაგრძელებლად მოსკოვში 21 იანვარს ჩავა იაპონიის პრემიერ-მინისტრი სინძო აბე.